Алматыдағы облыстық орталық әмбебап кітапханасында Қазақстан Жазушылар және Журналистер одағының мүшесі, Райымбек ауданының Құрметті азаматы Елеусіз Ахметкерімұлының «Дәуір дауысы» кітабының таныстырылымы өтті. Қаламгердің 70 жасқа толуына орай ұйымдастырылған әдеби шараға ақын-жазушылар, журналистер, ауылдан ат терлетіп жеткен сыныптастары мен шәкірттері қатысты.
1955 жылдың 15 желтоқсанында Қарасазда дүниеге келген Елеусіз Ахметкерімұлының өмір жолы – қайсарлық пен талаптың, еңбектің шынайы үлгісі. Мектепте жүргенде-ақ қазақ тілі мен әдебиетін құмарта оқып, газетке мақала жазып, аудандық «Советтік шекараның» жас тілшісі атанғаны бала Елеусіздің жазушылық жолындағы алғашқы шымылдығы еді. 1975 жылы Абай атындағы Қазақ педагогикалық институтына түсіп, география және биология пәні мұғалімі мамандығын үздік бітіріп шығады. Ұзақ жыл білім саласында еңбек етіп, ұстаздықтың шырағын жағып, әкімдік пен Мұқағали музейінде қызмет ете жүріп те қаламын ешқашан тастамаған. 2013 жылы «Мұқағали ақынның атамекені» атты кітабы жарық көрді. Кейін «Көңіл көкжиегінде» басылды. Енді, міне, «Дәуір дауысы» кітабы оқырманға жол тартты.
Әдеби кештің шымылдығын Қазақстан Жазушылар одағы басқармасы төрағасының орынбасары Бейбіт Сарыбай ашты.
– Елеусіз Ахметкерімұлының туындыларын оқығанда, оның жүрегінің ізі айқын сезіледі. Өмірін әдебиетке, ұстаздыққа, әсіресе мұқағалитану саласына арнаған тұлғаны бүгінгі биігімен шын жүректен құттықтаймын, – деп қаламгердің ел руханиятына қосқан үлесін айрықша атап, Қазақстан Жазушылар одағы төрағасының арнайы құттықтау хатын сахна төрінде салтанатпен табыстады.
Жаңа кітаптың алғысөзін жазған ақын, халықаралық «Алаш» сыйлығының иегері Биғайша Медеуова мінберге көтеріліп, тебіреніске толы тілегін жеткізді. Ол өз сөзінде:
– Мен оның шығармашылығымен алғаш танысқанда таңғалдым. Әр сөйлемінде уақыттың иісі, қоғамның күрсінісі, адамның жан тереңдігі бар. Мұндай қалам иелері қазақ әдебиеті үшін ауадай қажет, – деп жазушы еңбегіне әділ бағасын берді. Қазақстан Жазушылар одағының мүшесі Батық Мәжитұлы ізгі тілегін арнаса, ақын, журналист Қанат Тәкебаев жырдан шашу шашты. Елеусіз Ахметкерімұлына Д.Қонаев қорының «Мерей» орденін қордың вице-президенті Дәулетбек Жанботаев табыс етті.
Зиялы қауым сахнаға көтеріліп, жаңа туындының тұсаукесер рәсімін өткізді. 83 жастағы қарт оқырман Жеңіс Мұхамедиұлы ақ батасын берді. Шараның шарықтау шегінде Елеусіз ағамыздың сөзіне жазылған әндер орындалды. Ақынның «Қарасазым, қара шалғын!» әнін Мұрат Өміржан шырқаса, «Сыныптас достарға» өлеңіне ән шығарған ҚР Мәдениет қайраткері Арайлым Мамырбекова жүрек тербеткен әуезді әнді тамылжытты. Кеш қонағы Бағдат Молдахметұлының «Үш меркі» әні де залды ерекше әсерге бөледі. Мерейтой иесінің немересі Көркем Елеусіздің де өнері кештің көркін келтірді. Соңынан сөз алған Елеусіз Ахметкерімұлы жиналған жұртшылыққа алғысын жеткізіп, әдебиет әлемінде әлі талай тың дүниелерге қалам сілтейтінін айтты.
Кітаптың тұсаукесері 70 жылдық мерейтойлық дастарқанға ұласып, көптің ақ батасы мен ыстық ықыласы ақтарылып, мінезі жібектей, жүрегі жомарт қаламгердің еңбегі тағы бір мәрте бағаланды.
Құралбек СӘБИТОВ
