Тоғызқұмалақ – халқымыздың көне дәуірден жеткен ұлттық спорты. Бүгінде бұл ойынға деген қызығушылық артып, жас буын арасында кеңінен насихатталып келеді. Осы бағытта Кегендегі балалар мен жасөспірімдер спорт мектебінде тоғызқұмалақтан оқушылар арасында турнир өтті.
Аудандық ішкі саясат бөлімінің қолдауымен «Қамқор-Кеген» облыстық есту қабілеті нашар мүгедектер қоғамдық бірлестігі ұйымдастырған жарысқа аудандағы орта мектептерден келген 30-ға жуық оқушы қатысып, өнерін ортаға салды. Турнир барысында тоғызқұмалақтан республиканың 11 дүркін чемпионы Гүлсім Мұсаева арнайы шеберлік сағатын өткізіп, қатысушыларға ойынның қыр-сырын, әдіс-тәсілін таныстырды. Бұл тағылымды кездесу жас спортшылардың ұлттық ойынға деген қызығушылығын арттырып, оның терең философиялық мәнін түсінуге жол ашты.
Күні бойы тартысты өткен бәсекеде оқушылар жоғары дайындық деңгейін көрсетіп, тапқырлық пен стратегиялық ойлау қабілеттерін дәлелдеді. Бапкерлердің еңбегі мен жүйелі дайындықтың нәтижесінде бірқатар дарынды оқушы суырылып алға шықты.
Турнир қорытындысы бойынша жеңімпаздар мен жүлдегерлер анықталып, оларға арнайы диплом, медаль және естелік сыйлықтар табысталды. Іс-шара соңында ұйымдастырушылар мен қонақтар қатысушыларды жетістіктерімен құттықтап, турнирдің ұлттық құндылықтарды дәріптеу мен жастардың зияткерлік әлеуетін арттырудағы маңызын атап өтті.
Дәурен ӘБУТӘЛІПОВ
Кеген ауданы
