Қоғам дамыған сайын билік пен халық арасындағы байланыс та жаңа сапаға көтеріліп келеді. Бүгінде қоғам үнін есту, азаматтардың пікіріне құлақ асу – мемлекеттік басқарудың маңызды бағытына айналды. Бұл – бір күнде орындала салатын іс емес, жүйелі әрі шынайы еңбектің нәтижесі.
Қоғамдық кеңестер осы жауапты үдерістің бел ортасында. Биыл облысымызда ауыл-ауылды аралап, халықпен тікелей жүздескен 19 кездесу өткіздік. Жүздеген сауалға жауап іздеп, нақты шешімдер қабылданды. Соның ішінде «Төрт түлік» қосымшасындағы олқылықтарды түзетіп, республика көлемінде тиімді шешімге қол жеткіздік.
Экология, құрылыс сапасы, еңбек теңгерімі, медициналық қызмет сапасы секілді өзекті мәселелер де назардан тыс қалған жоқ. «MedBaqylau» цифрлық қоғамдық бақылау жүйесі енгізіліп, бұл бастама Қазақстан бойынша алғаш рет жүзеге асты. Алдағы уақытта «MektepBaqylau» және «QurylysBaqylau» жобалары арқылы ауыл тұрғындарының өз нысандарын бақылауына жол ашылмақ.
Биыл облысымыздың әлеуметтік-экономикалық дамуында тарихи көрсеткішке қол жеткізіп, табыс көлемі 1 триллион теңгеден асты. Бұл жетістік – бірліктің, еңбектің және қоғамдық бақылаудың нәтижесі. Халқымызда «Елге бай құт емес, би құт» деген дана сөз бар. Қоғамын тыңдаған, азаматымен санасқан елде ғана әділет салтанат құрады. «Әділетті Қазақстанды» құру – баршамыздың ортақ міндетіміз.
Алда келе жатқан Жылқы жылында ырыс-несібеміз артып, әр шаңырақта береке мен ынтымақ орнасын. Ел аман, жұрт тыныш болып, барлық арман-мақсаттар жүзеге ассын! Жаңа жыл әр отбасыға қуаныш, молшылық және жарқын үміт әкелсін!
Қазыбек Дәутәлиев,
Облыстық қоғамдық кеңес төрағасы
