Облыс әкімі Марат Сұлтанғазиев «Аlatau middle corridor group» компаниясының өкілдерімен кездесті. Онда екі тарап Алатау қаласындағы маңызды инфрақұрылымдық жобаларды іске асыру жайын талқылады.
Ең алдымен «Аlatau middle corridor group» компаниясының өкілдері облыс басшысына «Alatau» арнайы экономикалық аймағын дамытуға бағытталған жобаларды таныстырды. Онда көлік-логистикалық жобаларға басымдық берілген. Бұл қатарда көлік паркі, жүк қоймасы, бизнес орталықтары, әуежай мен теміржол терминалы және коммерциялық нысандар бар. Компания өкілдерінің айтуынша, қазір «Alatau» арнайы экономикалық аймағында ауқымды қойма алаңдары салынуда. Сонымен қатар жалпы құны 73,3 млрд теңгеге бағаланған заманауи көлік-логистикалық орталығының құрылысы жүріп жатыр. Бұл орталыққа шетелдік кәсіпкерлер қызығушылық танытуда. Олардың арасында көршілес елдердің алпауыт компаниялары бар. Аталған орталық Қытайдан Оңтүстік-Шығыс Азияға, Қазақстан, Ресей арқылы Еуропа мен Скандинавия елдеріне шығатын көлік дәлізі мен өзге де бағыттардың дамуына зор мүмкіндік береді.
«Аlatau middle corridor group» өкілдері аймақ басшысына өздеріне тиеселі құзірет шеңберінде заманауи қаланың инфрақұрылымын дамыту бағытында халықаралық әріптестікті нығайтуға күш салып жатқанын жеткізді. Салынып жатқан нысандарда робототехникалық және цифрлық жүйелерді кеңінен пайдалану көзделеген.
Өз кезегінде Марат Елеусізұлы «Аlatau middle corridor group» ЖШС өкілдеріне Алатау қаласының әлеуметтік-экономикалық дамуы мен жаңа инвестициялық жобаларды іске қосуда ауқымды жұмыс атқарылып жатқанын тілге тиек етті. «Қазір қала аумағында 21 мыңнан астам жұмыс орнын қамтитын 41 жоба жүзеге асып жатыр. Оның ішінде жалпы құны 1 трлн теңгені құрайтын 18 ірі өндіріс бар. Олардың қатарында PepsiCo, United Hygiene, «Молочная долина», ASP Arena, QazQon Hub, АВЗ және Исткомтранс секілді жетекші кәсіпорындар жұмыс істеп жатыр. Жалпы ауданы 97,9 мың гектарды құрайтын Alatau АЭА өңір экономикасының жаңа өсу нүктесіне айналып келеді. Аймақтың 24 мың гектардан астам аумағы агроөнеркәсіптік жобаларды іске асыруға бағытталған», – деді Марат Елеусізұлы.
Кездесу соңында аймақ басшысы жаңа қаланың заманауи келбетін қалыптастыру жолында еңбек етіп жатқан «Аlatau middle corridor group» ЖШС өкілдеріне алғыс білдіріп, әкімдік тарапынан барынша қолдау көрсетілетінін жеткізді.
Ермұрат МҰҚЫРБАЙ
