«Ең алдымен, мал шаруашылығын дамыту керек. 2035 жылға қарай әлемде мал етін тұтыну көлемі 233 миллион тоннаға дейін өседі. Соған сәйкес, оның импорты 27 миллион тоннаға дейін артады. Қазақстанның, сыртқа, әсіресе, Азия елдеріне ет шығаратын ірі экспорттаушыға айналатын мүмкіндігі бар» – деп Мемлекет басшысы бүгінгі «Түркістан» газетіне берген сұхбатында мал шаруашылығын дамыту турасындағы ойын айтты. Иә, биліктің ауылшаруашылығын дамыту үшін көп жұмыс істеп жатқаны анық. Тіпті көршілес мемлекеттермен салыстырғанда біздің елімізде бұл салаға деген қаражаттың бөлінуі де әлдеқайда қомақты. Дегенмен еліміздегі шағын шаруашылықтар жеткілікті көлемде субсидия ала алмай отыр. Міне, осы мәселені аңғарған Мемлекет басшысы Үкіметке осы мәселені айрықша назарда ұстауға тапсырма берді.
Иә, мал шаруашылығын дамыту дегенде әуелі ауылдардағы ветеринар мамандарының тынымсыз жұмысы да ойға оралады. Мал шаруашылығын сапалы дамыту үшін дәл осы сала мамандарының еңбегі ерен болмақ. Өйткені мал саулығы адамның саулығына тәкелей әсер етеді. Сондықтан ауылдардағы ветеринар дәрігерлер жыл он екі ай бойы төрт түліктің уақытылы вакцина алуы, олардың арасында шығатын дерттің алдын алу, қандай да бір жағдай болып, дерт дендеген тұста оны дереу ауыздықтау мақсатында білек сыбана еңбек етуде. Мардымсыз жалақы болса да өз істеріне адалдықтарын танытуда. Бірақ биылғы жылы ветеринар дәрігерлердің жалақысының артатыны туралы Үкіметте көтерілгелі бері сала мамандарының жұмысқа деген құлшынысы да арта түсті. Сонымен қатар жыл соңында облыс әкімі Сұлтанғазиев Марат Елеусізұлының қолдауымен өңірдегі ветеринариялық қызметтің материалдық-техникалық базасын нығайту бағытында маңызды қадам жасалды. Ауыл шаруашылығы саласын дамыту, ветеринариялық қызметтің сапасын арттыру мақсатында Ұйғыр ауданының ветеринариялық бөліміне заман талабына сай, қолданысқа ыңғайлы 6 дана «JAC T6» және 1 дана «ГАЗ 231073» жаңа автокөлік табысталды. Бұл – ауданның ветеринариялық жүйесін жетілдіруге серпін беріп, қызметтің қолжетімділігі мен жеделдігін арттыра түсетіні сөзсіз.
Ендеше мемлекет басшысының ауылшаруашылығын, оның ішінде мал шаруашылығын дамытуға қатысты айтқан ауқымды ойлары ел дамуына жасалған жарқын қадам деп есептейміз.
Елнұр Досымбеков,
Ұйғыр аудандық ветеринария бөлімінің басшысы
