Бүгін – тарихи сәт. Өйткені небәрі қысқа уақытта әзірленген жаңа Конституцияның жобасы жарияланды. Ата Заңымызға енгізілетін өзгерістер туралы бас қосқан Конституциялық комиссия мүшелері кеше ғана жаңа Ата Заң қабылдау жайын тілге тиек етіп, ұсыныс жасаған еді. Міне, бүгін сол жаңа Ата Заңымыздың жобасы ортаға салынды.
Оны дайындау кезінде соңғы 6 айда келіп түскен азаматтардың, қоғамдық ұйымдар, саяси партиялар мен сарапшылардың ұсыныстары, сондай-ақ Комиссия мүшелерінің пікірлері, ескертулері мен ұсынымдары ескеріліпті. Сол ұсыныстар нәтижесінде жаңа Конституциямыз кіріспеден, 11 бөлімнен және 95 баптан тұрады екен. Отырыста Конституциялық сот төрағасының орынбасары Бақыт Нұрмұханов «Конституцияның Преамбуласы толығымен жаңарды. Онда еліміздің өткенін дәріптейтін, бүгіні мен болашағына бағдар болатын жалпыұлттық құндылықтар көрініс тапты», – деді. Иә, өткенімізді дәріптеп, бүгінімізді бағалап, болашағымызға бағдар жасай алсақ, біз алмайтын қамал болмас.
Қасым ханның Қасқа жолын, Есім ханның ескі жолын, Әз Тәукенің Жеті жарғысы сынды дала заңдарының заңды жалғасы болған тәуелсіз Қазақстанның бұған ейінгі қабылданған Ата Заңдары да ел егемендігінің еңселі болуы жолында қызмет етті. Енді халыққа ұсынылатын жаңа Конституциямыз да тәуелсіздігімізді одан сайын тұғырлы етеді деп сенеміз. Жалпыхалықтық референдум арқылы қабылданғалы отырған жаңа Конституциямызды халық болып қолдайтынына да сенемін. Өйткені әділетті Қазақстандағы демократиялық қоғамда өмір сұріп жатқандықтан әркім өз ойын, пікірін ашық ортаға салуға құқылы. Бұл – біздің басты жетістігіміз. Ендеше жобасы әзірленіп отырған жаңа Ата Заң жақсылықтың нышаны болғай.
Майгүл Тұңғышбаева,
Ұйғыр ауданы Абай атындағы
мектеп-гимназияның тарих пәні мұғалімі
