Алматы облысының тұрғыны жеке кәсіпкермен жасалған келісімшартқа сәйкес жиһаз дайындау қызметіне тапсырыс берген. Алайда белгіленген мерзімде қызмет толық көлемде көрсетілмей, дайындалған жиһаз сапа талаптарына сәйкес келмеген.
Осы жағдайға байланысты тұтынушы көрсетілмеген және тиісінше орындалмаған қызмет үшін төленген қаражатты қайтару туралы талап қойған. Қызмет көрсетуші тарапынан аталған талапты ерікті түрде орындау жүзеге асырылмаған.
Тұтынушының өтініші негізінде Алматы облысы бойынша Сауда және тұтынушылардың құқықтарын қорғау департаменті тарапынан құқықтық түсіндірме жұмыстары жүргізілді. Қолданыстағы заңнама талаптары түсіндіріліп, қызмет көрсетушіге тұтынушы алдындағы міндеттемелерін орындау қажеттігі ескертілді.
Қабылданған шаралардың нәтижесінде дау сотқа жеткізілмей, тұтынушының мүддесі қорғалды. Қызмет көрсетуші тарапынан тұтынушыға 105 000 (жүз бес мың) теңге мөлшеріндегі ақшалай қаражат қайтарылды.
Бұл жағдай азаматтардың сапалы қызмет алуға және заң талаптарына сәйкес өз құқықтарын қорғауға толық құқылы екенін көрсетеді.
Департамент тұтынушылардың құқықтарын қорғау бағытындағы жұмысын жалғастырып, азаматтардың өтініштерін белгіленген тәртіпте қарауды қамтамасыз етеді.
