Жырсүйер қауымның кітап қоржыны жаңа жинақпен толықты. Еңбекшіқазақ ауданы ақындарының «Алтын бесік» атты антологиясы көпшілікке таныстырылып, тұсауы кесілді. Жинаққа жүрекжарды өлеңдері енген авторлар оқырманмен кездесу өткізіп, жырдан шашу шашты.
Еңбекшіқазақ ауданы Қаракемер ауылдық Мәдениет үйінде ұйымдастырылған әдеби кешке өлең-сөздің қадірін түсінген аудан азаматтары, ауыл тұрғындары мен жастар жиналды. Рухани шарада Қазақстан Жазушылар одағының мүшесі, белгілі айтыскер ақын Даубай Мамытұлы: «Ауданымызда өзіндік қолтаңбасымен танылған жалынды жастар көп. Сол мықтылардың біразының шығармасы классик ақындардың өлеңдерімен бірге «Алтын бесік» антологиясына кіріп отыр. Бұл жастардың шабытын шыңдап, болашаққа қанат қақтыратын баспалдақ болмақ», – деп ақын ізінен ерген іні-қарындастарына шығармашылық табыс тілей отырып, кітаптың тұсаукесер рәсімін жасады.
«Алтын бесік» антологиясы Еңбекшіқазақ ауданы әкімдігінің қолдауымен былтыр жыл соңында жарық көрген. Аты айтып тұрғандай, жинаққа әр салада қызмет етсе де, поэзия әлемінде әдемі де әсерлі өлең-жырымен танылған аудан ақындарының таңдаулы шығармалары топтастырылған.
«Ақындар – ақиқаттың айнасы» тақырыбында баяндама жасаған аудандық кітапхана әдіскері Гулия Саурықова кеш қонақтарын жыр-жинаққа енген авторлармен таныстырды. Классик ақын Тұманбай Молдағалиевтен бастап, жинақта 24 қаламгердің шығармасы топтастырылған. Олардың арасында Еңбекшіқазақ ауданында туып-өскен, өзі өмірден өтсе де, ел жадында өміршең өлеңі қалған аға буын өкілдері мен жырларымен жұрттың жүрегіне жол таба білген жастар да бар.
Қаракемер ауылдық Мәдениет үйіндегі «Вокал» үйірмесінің шәкірттері ақындардың өлеңдерін мәнерлеп оқыса, «Кемерсаз» ансамблі домбырадан күй төкті. Мәдениет үйінің директоры Арайлым Мамырбаева әннен шашу шашты.
Кеш соңында аудандық кітапхана директоры Дариға Жанәбілова ақындарды жаңа жыр-жинақтың жарық көруімен құттықтап, оқырманмен керемет кездесу ұйымдастырған Мәдениет үйінің ұжымына алғысын білдірді.
Құралай Мұратқызы
Еңбекшіқазақ ауданы
