Алатау қаласындағы «Пеноплекс» ЖШС ұжымымен Қазақстан Республикасының Конституциясы аясындағы түсіндіру жұмыстары жүргізілді. Кездесуге коалиция төрайымы, қала мәслихатының төрайымы Р. М. Абилова, облыстық мәслихат депутаты, Алматы облысы Ауған соғысы ардагерлері ҚБ-нің төрағасы Н. Л. Түймелиев, қала мәслихаты депутаттары А. М. Иманбеков және С. Т. Мұхамедияров, сондай-ақ ішкі саясат бөлімі басшысы А. Ө. Ақжігітов қатысты.
Жиын барысында Конституцияның ел дамуы мен қоғам тұрақтылығын қамтамасыз етудегі рөлі, азаматтардың құқықтары мен бостандықтарын қорғаудағы маңызы кеңінен түсіндірілді. Сонымен қатар, заң үстемдігін сақтау, қоғамдық келісімді нығайту және азаматтық жауапкершілікті арттыру мәселелері қозғалды.
Коалиция мүшелері өз сөздерінде Конституция – тәуелсіздігіміздің берік тірегі әрі мемлекетіміздің стратегиялық бағытын айқындайтын басты құжат екенін атап өтті. Кездесу ашық форматта өтіп, кәсіпорын қызметкерлері өздерін толғандырған сауалдарын қойып, тұшымды жауаптар алды.
Мұндай мазмұнды кездесулер еңбек ұжымдары арасында құқықтық мәдениетті қалыптастыруға, қоғам мен билік арасындағы өзара сенімді арттыруға оң ықпал ететіні сөзсіз. «Пеноплекс» ЖШС ұжымы ұйымдастырушыларға алғысын білдіріп, алдағы уақытта да осындай танымдық шаралардың жалғасуына қолдау білдірді.
Саурбаева Риза Санаққызы,
Алатау қаласының аналар кеңесінің төрағасы
