Биыл қазақ поэзиясының алып тұлғасы – Жамбыл Жабаевтың туғанына 180 жыл. Ақын мерейтойы республика көлемінде жыл бойы кеңінен аталып өтеді. Жамбыл ауылындағы Мәдениет үйінде мерейтойлық іс-шаралардың шымылдығы түрілді.
Жамбыл аудандық білім бөлімінің қолдауымен өнерлі ұстаздар мен мектеп оқушылары дайындаған «Тыңда, дала, Жамбылды!» атты әдеби-сазды кешке ақын-жазушылар, әкімдік қызметкерлері мен мәслихат депутаттары, ауыл тұрғындары келді. Қонақтар алдымен Мәдениет үйінің кіреберісінде Жамбыл музейінен әкеп қойылған көрмені аралап, ақын қолының табы қалған жәдігерлермен танысты. Көрермен залында Ұзынағаш ауылындағы өнер мектебінің оқушылары сахналаған Жамбылдың жастық шағынан қойылым тамашаланды.
Салтанатты сәтте Жамбыл ауданы әкімінің орынбасары Әділбек Қамбарұлы жиналғандарды жыр алыбының 180 жылдығына арналған мерейтойлық шаралардың басталуымен құттықтап, ұлы ақынның қазақ руханиятындағы орны мен өнегелі өміріне тоқталды. Той шымылдығын жас өнерпаздардың түргенін ризашылықпен атап өтті.
Көпшілік алдында Қазақстанның Мәдениет қайраткері, Қазақстан Журналистер одағы сыйлығының иегері, танымал қаламгер, ардагер-журналист Күмісжан Байжан сөз алып, жүз жасаған абыз ақын өмірінің аңыз болып тараған кейбір сәттерінен тағылымды әңгіме қозғады. Қазақтың қара өлеңін соншалықты биікке көтеріп, жүрегінің түбінен қайнап шыққан асыл жырларымен қалың жұртшылықтың махаббатына бөленген Жамбыл бабаға деген айрықша құрметін білдірді. Артына асыл қазына, таусылмас інжу-маржан қалдырған ұлы тұлғаның есімін ұлықтау жас ұрпақ тәрбиесінде ерекше мәнге ие екенін, Ұлы дала үніндей болған Жамбыл жырлары ұлт жадында мәңгі жаңғыра беретінін айтты.
«Тыңда, дала, Жамбылды!» атты әдеби-сазды кеште қосымша білім беру мекемелерінің өнерлі оқушылары мен ұстаздары көрерменге тамаша көңіл-күй сыйлады. Жанар Ермекбаева, Райхан Жәнібекова, Ерлан Қалмаханұлы басшылық ететін Ұзынағаш пен Жамбыл ауылдарындағы өнер мектептері мен «Жас ұлан» оқушылар үйінің ұжымы шараға тыңғылықты дайындалғанын байқатты. Концерттік бағдарламада Жамбылдың әндері мен күйлері кеңінен орындалып, жырлары жатқа мәнерлеп оқылды, балғын бишілер мың бұрала биледі. Аталған білім ұйымдарының біріккен оркестрі Нұрғиса Тілендиевтің «Ата толғауы», «Әлқисса» күйлерін, ал жас ақындар Жамбыл мен Құлмамбеттің, Жамбыл мен Айкүмістің айтыстарынан үзінді орындады.
Жыр алыбына арналған мерейтойлық шаралар аудан мектептерінде жалғасып жатыр.
Серік САТЫБАЛДИЕВ
Жамбыл ауданы
