Қонаев қаласындағы Жастар ресурстық орталығында «Жаңа Конституция: орнықты дамудағы қоғамдық диалог пен жастардың рөлі» атты кездесу өтті. Аймақтағы белсенді жастар бас қосқан шарада ашық әрі конструктивті диалог орнатылып, еліміздегі өзекті қоғамдық-саяси өзгерістер талқыланды.
Кездесуге ҚР Парламенті Мәжілісінің депутаты, республикалық жалпыұлттық коалиция мүшесі Анас Баққожаев, «AMANAT» партиясы Алматы облыстық филиалының атқарушы хатшысы, аймақтық жалпыұлттық коалиция төрағасының орынбасары Серік Нұрқадіров, облыстық қоғамдық кеңестің төрағасы Қазыбек Дәуітәлиев, мәслихат депутаты Сергей Горяной қатысып, өз ойларын ортаға салды.
Мәжіліс депутаты Анас Ахатұлының сөзінше, елдің жаңа Конституция жобасы – мемлекетіміздің саяси-құқықтық жүйесін жаңғыртудағы батыл бастама. Ел жастары бұл құжатты мемлекеттің болашағына жасалған ұзақмерзімді инвестиция деп қабылдауы тиіс. «Дайындалған құжаттың сапасына еш күмәнім жоқ. Жаңа Конституция жобасының ұтымды тұстары аз емес. Кіріспесінің өзі қандай?! Ұлы дала перзентінің әлемге айтқан монологы секілді. Оқисың, сүйсінесің, рухтанасың. Сену – көз жұмып қабылдау емес. Сену жауапкершілікпен бірге жүруі тиіс. Конституцияға дауыс беретін – сіздер. Сондықтан референдумға дейін мәтінмен мұқият танысып, әр сөзіне ой жүгіртіңіздер. Мұндай өзгеріс 20, 50 жылдан кейін де болуы мүмкін. Бұл – дамып жатқан елдің белгісі»,– деді Анас Баққожаев.
Басқосуда облыстық жалпыұлттық коалиция төрағасының орынбасары Серік Нұрқадіров ұсынылып отырған жаңа Конституция жобасы – эволюциялық сипаттағы саяси реформа екенін жеткізді. Оның пайымынша, жаңа Конституция қолданыстағы Ата Заңның тарихи миссиясын жоққа шығармайды, керісінше, соның негізінде мемлекеттік жүйені жаңа қоғамдық сұраныстарға бейімдеуді көздейді. Ал облыстық жалпыұлттық коалиция мүшесі Қазыбек Дәуітәлиевтің пікірінше, жаңа Ата Заң еліміздің қалыптасқан мемлекеттік құрылымын, халықаралық беделін, адами капиталды, білім, ғылым және инновацияларды дамытудағы айқын басымдықтарын нақты көрсетіп, Қазақстанның болашаққа сенімді бағдармен қадам басып келе жатқанын аңғартады. Бүгінде жастар бұл реформалардың әділетті, ашық және жауапты мемлекет қалыптастыруға берік негіз қалауына атсалысуы қажет. «Қазақстан үшін бұл кезең – саяси реформалардың қорытындысы ғана емес, жаңа мемлекеттік даму дәуірінің бастауы деп үміттенеміз. Алдағы кезеңде Конституция жобасы кең көлемде талқылаудан өтіп, түпкілікті шешімнің референдум арқылы қабылданатыны белгілі. Бұл – әрбір азаматтың ел болашағына тікелей қатысуына мүмкіндік беретін тарихи сәт», – деді Қазыбек Дәуітәлиев.
Жүздесуде «Жастар рухы» жастар қанатының Алматы облыстық филиалының төрағасы, аймақтық жалпыұлттық коалиция мүшесі Әділет Айтқазы бастаған жалынды жастар сөз сөйлеп, Конституцияның жаңа жобасымен толық танысқанын айтып, қолдау білдірді.
Ерзат АСЫЛ
