Кенен Әзірбаевтың қызы ел болашағына зор сенім білдірді

Референдумға Алматы облысындағы мәдениет майталмандары, өнер жұлдыздары да қатысып, өз таңдауларын жасады. Атап айтқанда, елімізге танымал Төрткен Кененқызы Іле ауданындағы №401 учаскеге келіп, дауыс берді. Учаскеде Төрткен Кененқызына ерекше құрмет көрсетілді.
Дауыс беру рәсімінен кейін Төрткен Кененқызы учаскеде жиналған азаматтарға ақ батасын беріп, елге амандық, жұртқа бірлік пен береке тіледі. Оның жүрекжарды батасын алған тұрғындар ақ жаулықты ананың сөзін ықыласпен тыңдап, алғысын жаудырды.
90 жастағы өнер майталманы қазіргі таңда көптеген өзгерістерге куә болып отырғанын айтты. Төрткен Кененқызының сөзінше, халықтың белсенділігінің күн санап артуы реформаға, болашаққа деген сенімін айғақтайды. «Жаңа Конституция жобасында шығармашылыққа айрықша мән берілген. Жалпы, кез келген салаға, оның ішінде мәдениет пен өнер саласына жаңа қадамдар, жаңашылдықтар өте қажет. Себебі, жаңа тыныспен мәдениет пен өнер дамиды. Ал бұл салалардың дамуы еліміздің рухани баюына ықпалын тиізеді. Бұл өзгеріс төл тарихымыз бен өнеріміздің қайта жаңғыруына мол мүмкіндік береді»,– дейді Төрткен апа.