Бүгінгі референдумда мүмкіндігі шектеулі заматтар да назардан тыс қалмады. Ұйғыр ауданының орталығы Шонжы ауылындағы №929 дауыс беру учаскесінде 1386 дауыс берушінің 17-сі мүмкіндігі шектеулі, үйден дауыс беретін жандар. Референдум комиссиясының мүшелері әрбір азаматтың үйіне барып, таңдау жасауларына мүмкіндік туғызды.
Шонжыдағы №929 референдум комиссиясының мүшелері түс ауа үйден дауыс беретін азаматтарға жолға шықты. Әр азаматқа бүгінгі күннің маңыздылығын түсіндіріп, референдум бюллетеніндегі ақпараттармен толық таныстырып шықты. Комиссия төрағасының орынбасары Мақсат Қырықбаев: «Біз үйден дауыс беруге өтініш қалдырған қартттар мен мүмкіндігі шектеулі әр азаматтың үйіне барамыз. Себебі әр жанның дауысы маңызды», – дейді.
Досқанаев Мұхаметқали – 7 жылдан бері төсек тартып жатқан мүмкіндігі шектеулі азамат. Жүріп-түрып, еңбек етуге мүмкіндігі болмаса да бүгінгі ел тарихындағы маңызды күнде таңдау жасауға қабілетті. Бұл күннің ерекшелігін де, болашақ үшін толғақты мәселе екендігін де жақсы түсінеді. Сондықтан өз таңдауын жасап, дауыс берді. Өзіндей азаматтарды осындай саяси науқаннан шет қалдырмай, барлық мүмкіндікті жасап отырған мемлекет басшысына алғысын да айтып өтті.
Анар Дүйсенбайқызы
Ұйғыр ауданы
