Агросектор өңір экономикасының негізі екенін ескерсек, мұндағы әр шаруа облыстың әлеуметтік-экономикалық дамуына өз үлесін қосып жатқаны белгілі. Өйткені ауыл шаруашылығы – экономиканың бірнеше бағытын қамтитын үлкен сала. Мал шаруашылығы мен өсімдік шаруашылығынан, бау-бақшадан өнім алып, өндірісті жолға қойып, ішкі нарықты отандық өніммен қамтып, сыртқа да экспорттап, жергілікті жердің азаматтарына тұрақты және маусымдық жұмыс орындарын ұсынып отырған шаруа қожалықтары бар. Олардың бірі – «Green Eco» ЖШС.
Өндіріс 2017 жылдың күзінде басталып, қазір жылына 3,5 млн қаптама деңгейіне шыққан. Бұл – ай сайын 100 тонна жас көкшөп өндіріледі деген сөз. 1,3 гектар аумақта орналасқан жылыжайда 100-ден аса адам еңбек етеді. Мұнда айына 65 тонна немесе 400 мың бірлік өнім өндіріліп, ол еліміздің ең үлкен қалаларындағы 350-ден аса ірі сауда орталықтарына жіберіледі. Ең бастысы – бәрі балғын түрінде. «Мысалы біз таңертең жіберсек, ол кешке тұтынушылардың дастарқанында тұрады. Оның үстіне біз ұсақ жылыжай кешендері үшін ауылшаруашылық өнімдерінің агрегаторы болуға, осы бағыттағы серіктестікке әрқашан дайынбыз. Әрине, оның өз шарттары бар. Айталық, жылыжайлардың көлемі 300 шаршы метрден кем болмауы, өнімдер пестицидтерсіз және гормондарсыз өсірілген, экологиялық тұрғыда таза болуы тиіс. Бізбен серіктес болу өте тиімді. Өйткені ұсақ өндірушілердің өнімін толықтай сатып ала аламыз, мамандарды оқытып, агрономиялық қызмет көрсетеміз, көшеттермен қамтамасыз етеміз. Біз жылыжай жобасында әлемдегі ең үлкен сұранысқа ие және ең озық технологияларды біріктіруге тырыстық. Бұл технологиялардың Қазақстанда жұмыс істеуі үшін құрылыстың, жабдықтарды монтаждау мен жөндеудің түрлі кезеңдерінде бізге үш елден – Израильден, Даниядан, Нидерландыдан мамандар келді. «Green Eco» компаниясының Алматыға ғанаемес, Қазақстанның Астана, Қарағанды, Павлодар, Тараз, Талдықорған сияқты қалаларына, сондай-ақ меншікті тарату орталықтарына тауарды үздіксіз жеткізуді қамтамасыз ететін өз логистикалық орталығы бар», – дейді ЖШС бас директоры Роман Шнайдерман.
Кәсіпорын иесі жаңа Конституцияда қарастырылған өзгерістер кәсіпкерлік пен агроөнеркәсіп кешенінің дамуына берік құқықтық негіз қалыптастырып, экономикалық өсімнің, халықты жұмыспен қамтудың және азаматтардың әл-ауқатын арттырудың маңызды тетігіне айналатынына сенім білдірді.
