Ақпанның 28-інде, Жамбыл Жабаевтың туған күні ақынның әдеби-
мемориалдық музейінде мерекелік шара өтті. Жамбыл ауданының Жамбыл
ауылындағы музейде жыр алыбының туғанына 180 жыл толуына орай
ұйымдастырылған шараға облыс әкімі Марат Сұлтанғазиев қатысып, зиялы
қауым өкілдерімен бірге ақын рухына құрмет көрсетті. Қазақ халқының дара
тұлғасына арналған шараға сонымен қатар ақынның ұрпақтары, аудан әкімі
Нұрлан Ертас, ардагерлер мен тұрғындар қатысты.
Алдымен өңір басшысы алыс-жақыннан келген қонақтармен бірге
ақыннның музей-үйі алдындағы ескерткішіне гүл шоқтарын қойды. Музей
ауласындағы кесенесінде тізе бүгіп, аруағына құран бағышталды. Музейдің
мәжіліс залында жыр алыбының өнегелі ғұмыры мен өшпес мұрасы туралы
тағылымды әңгіме айтылып, телегей-теңіз жырымен ел рухын асқақтатқан
дара тұлға есіміне зор құрмет көрсетілді.
Салтанатты жиында көпшілікті жыр алыбының 180 жылдық
мерейтойымен құттықтаған облыс басшысы Марат Сұлтанғазиев тағылымды
сөз қозғады.
– Бұл мерейтой бүкіл қазақ халқының рухани мерекесі. Халық жадында
Жамбыл бабамыз елдік пен ерліктің, әділдік пен намыстың жыршысы ретінде
мәңгілік сақталады. Екі ғасырдың куәсі – Жамбыл шығармашылығы тұтас
дәуірдің шежіресі. Бізге қалдырған мол мұрасы рухани тәуелсіздігіміздің
тірегі, – деген Марат Елеусізұлы осыдан бір күн бұрын Алматыдағы Жамбыл
атындағы мемлекеттік академиялық филармониясында ақынның 180 жылдық
мерейтойының ресми ашылғанын айтты. Өмірін рухани құндылықтар мен
әділеттілікке арнаған Жамбыл Жабаев ескерткіштері әлемнің бірнеше
қаласында халқымыздың мәртебесін асқақтатып тұрғанын, бүгінгідей
тағылымды шаралар жас ұрпақтың ұлттық құндылықтарға негізделген
дүниетанымын қалыптастыратынын тілге тиек етті.
Облыс басшысы өз сөзінде ата-бабамыз ұрпақтан-ұрпаққа өсиеттеген
әділдік пен елдік мұраттардың бүгінгі таңда нақты істермен жалғасып
келетінін атап өтіп, осы ретте ел өміріндегі маңызды саяси кезеңге тоқталды.
Айтуынша, Мемлекет басшысының Жарлығымен 15 наурызға белгіленген
республикалық референдумда жаңа Ата Заңға дауыс беріліп қана қоймай,
келер ұрпақтың қандай мемелекетте өмір сүретіні айқындалмақ. Ұсынылған
жаңа Конституция жобасы азаматтардың мүддесі мен елдегі тұрақтылықты алдыңғы қатарға қоятын тарихи құжат екенін айтып, реформаның басты өзегін, ерекшелігін түсіндірді. Тарихи-мәдени марамызды сақтау мен дамыту да конституциялық міндет ретінде бекітілгенін атап өтті. Бұл ұлттық кодты сақтай отырып, заманауи өркениетке ұмтылудың айқын көрінісі. Көпшілікті
ортақ болашағымызды қалыптастыру жолында белсенділік танытуға
шақырды. Жамбылдың тікелей ұрпағынан немерелері Жеңісхан Ізтілеуұлы
мен Салтанат Тезекбайқызына қазақы салтпен сый-құрмет көрсетті.
Салтанатты жиында сөз сөйлегендер Жамбылдың асыл мұрасының
маңызын баса айтты. Оның жырлары елдік пен ерліктің, бірлік пен
парасаттың айнасы. Ұлы ақынның есімі халық жадында мәңгі сақталып, жас
ұрпаққа рухани үлгі бола бермек. Қазақтың ұлы жырауы, жыр алыбы
Жамбыл Жабаев – қазақ халқының ақындық дәстүрін жалғастырып, өміршең
өлеңімен халықтың мұң-мұқтажын жырлаған ұлы тұлға. Ақын шығармалары
– ұлттық рухтың жарқын көрінісі. Бұл орайда белгілі қаламгерлер,
мемлекеттік сыйлықтың иегері, ақын Нұрлан Оразалин, жазушы, қоғам
қайраткері, Қазақстанның Еңбек сіңірген қайраткері Нағашыбек
Қапалбекұлы өздерінің ой-пікірлерімен бөлісті. Сондай-ақ халықаралық
«Түрксой» ұйымының бас хатшысы Сұлтан Раев, Халық қаһарманы, генерал-
полковник Сәт Тоқпақбаев, академик Төлеген Қожамқұлов жыр дүлдүлінің
өнегелі өмірі мен шығармашылығына байланысты лебіздерін білдірді.
Шараға сонымен қатар белгілі ақын, Түркі әлемі Жазушылар одағының
төрағасы Ұлықбек Есдәулет, Қазақстан Жазушылар одағы басқармасы
төрағасының орынбасары Қасымхан Бегманов қатысты.
Мерекелік кеш соңынан аудандық Мәдениет үйі жанындағы «Сүйінбай
сазы» фольклорлық-этнографиялық ансамблінің концерті тамашаланды.
Серік САТЫБАЛДИЕВ,
Жамбыл ауданы
