Қоғамдық қауіпсіздік – әрбір азаматтың тыныш өмір сүруінің, елдегі тұрақтылық пен қоғамдық келісімнің басты негізі. Бүгінде қауіпсіздікті қамтамасыз ету тек құқық қорғау органдарының ғана емес, әрбір азаматтың ортақ міндетіне айналып отыр. Өйткені заң талаптарын сақтау, қоғамдық тәртіпке жауапкершілікпен қарау және құқықбұзушылықтың алдын алуға атсалысу – қауіпсіз қоғам қалыптастырудың басты алғышарттары.
Қазіргі таңда қоғамдық қауіпсіздікті қамтамасыз ету бағытында құқық қорғау органдары профилактикалық жұмыстарды күшейтіп, тұрғындармен тығыз байланыс орнатуда. Аула аралау, түсіндіру кездесулері, әлеуметтік желілер арқылы ақпараттандыру, жастармен және еңбек ұжымдарымен өткізілетін кездесулер – құқықбұзушылықтың алдын алудың тиімді тәсілдерінің бірі. Мұндай шаралар азаматтардың құқықтық сауаттылығын арттырып қана қоймай, заң талаптарын құрметтеу мәдениетін қалыптастыруға ықпал етеді.
Сонымен қатар қоғамдық қауіпсіздікті қамтамасыз етуде тұрғындардың белсенділігі ерекше маңызға ие. Күдікті жағдайлар туралы дер кезінде хабарлау, қоғамдық орындардағы тәртіпті сақтау, өзара сыйластық пен жауапкершілікті дәріптеу – қылмыстың алдын алуға көмектесетін маңызды қадамдар. Қауіпсіздік – тек полицияның емес, бүкіл қоғамның ортақ ісі екенін әрбір азамат түсінуі қажет.
Заң мен тәртіп үстемдік құрған қоғамда адамдардың мемлекетке деген сенімі артып, елдің әлеуметтік-экономикалық дамуына қолайлы жағдай қалыптасады. Сондықтан әрқайсымыз заң талаптарын сақтап, қоғамдық тәртіпке бейжай қарамай, қауіпсіз әрі тұрақты қоғам қалыптастыруға өз үлесімізді қосуымыз қажет. Сонда ғана тыныштық пен тұрақтылық салтанат құрған, болашағына сеніммен қарайтын қоғамды бірге қалыптастыра аламыз.
Тоғжан ЖОЛДЫҒАЛИ