Президент Қасым-Жомарт Тоқаевтың «Жаңа тарихи кезеңдегі Қазақстанның өзекті міндеттері» атты халыққа арнаған Жолдауын тыңдап отырып, мәдениет саласының маманы ретінде де, қатардағы оқырман ретінде де көкейде жүрген көп ойдың түйінін тапқандай болдым. Мемлекет басшысы Жолдауда адами капиталды сапалы дамыту, білім мен ғылымды ілгерілету, жасанды интеллект пен цифрландыруды ұлттық мүддеге бағыттау, сондай-ақ креативті индустрияны өркендету сияқты стратегиялық міндеттерді айқын айқындап берді. Мұны жай ғана мінберден айтылған сөз деп қабылдауға болмайды — бұл қоғамның рухани саулығы мен елдің ертеңіне арналған нақты жол картасы. Шындығында, қай заманда да елдің бәсекеге қабілеттілігі тек қазба байлықпен немесе зәулім ғимараттармен өлшенбеген. Ең басты байлық — адам, оның білімі, ішкі мәдениеті мен ұлттық санасы. Осы тұрғыдан алғанда, Жолдауда жүктелген тапсырмалар мен «Кітап оқу мәдениетін дамыту және зерделі ұлт қалыптастыру» жөніндегі мемлекеттік саясат біздің мәдениет пен кітапхана саласындағы ісімізге жаңа дем беріп, жауапкершілігімізді еселей түсті.
Бүгінгі таңда кітапханалар мен мәдениет ошақтары — бұрынғыдай тыныш отырып, қағаз парақтайтын ғана орын емес. Бұл — заман талабына сай жаңғырып, цифрлық технологияларды игерген, жастардың басын қосатын, ізденетін, білім мен идеялар тоғысатын зияткерлік хаб. Президентіміздің ілім-білімді ұлықтап, цифрлық дамуды, сапалы білім мен руханиятты қатар қоюы — өңірлердегі, әсіресе ауыл-аймақтағы кітапханалардың инфрақұрылымын жаңартуға және қызметін сапалы жаңа деңгейге көтеруге кең жол ашады. Өз басым Жамбыл ауданының бай тарихын терең зерделеуді, өлкетануды насихаттауды, ұлттық әдеби мұрамызды цифрландыруды және өсіп келе жатқан жас буынның қолына кітап ұстатып, оларды ізденіске баулуды өзімнің кәсіби де, азаматтық та басты парызым деп білемін. Себебі тамыры терең, тарихын құрметтейтін әрі білімге құштар халықты ешқандай да дағдарыс шайқай алмайды. Жолдауда қойылған басымдықтарды өміршең ету — тек мемлекеттік органдардың ісі емес, бұл — мәдениет өкілдері мен әрбір саналы азаматтың ортақ борышы. Болашаққа жасалған бұл сенімді қадам бәрімізді бір мақсатқа жұмылдырып, зерделі ұлт қалыптастыру жолындағы рухани жаңғыруымыздың жаңа парағын ашарына кәміл сенемін.
Аяужан СӘДУАҚАСОВА,
Жамбыл аудандық кітапханасының директоры