Қонаев қаласында «Coliseum» open» атты панкратионнан республикалық ашық турнир өтті. Сайысқа төрт санатқа бөлінген 10-11, 12-13, 14-15 және 16-17 жас аралығындағы жасөспірімдер қатысты. Еліміздің әр өңірінен, Алматы облысының аудандары мен Қонаев қаласынан 120-дан астам спортшы жиналды.
Облысымызда тұңғыш рет ұйымдастырылып отырған турнир «Біз – есірткіге, терроризмге және буллингке қарсымыз» деген ұранды ұстанды.
«Coliseum» open» клубының негізін қалаушы Талғат Ибрагимов: «Біздің еліміз үшін панкратион жекпе-жегі салыстырмалы түрде жас спорт түрі болғанымен, онымен айналысушылар саны Қазақстанда үш мыңнан асады. Бұл сан жыл санап артып келеді. Соның ішінде Алматы облысы жетекші өңірлердің бірінен саналады. Облыс аудандарында панкратион секциялары табысты жұмыс істеуде. Бұқараға кеңінен танылған «Coliseum» open» жауынгерлік клубының Қонаев қаласында ашылғанына 10 жыл болды. Клуб мүшелері жарыс қанжығасын жыл сайын толтырып келеді. Мұндай сайыстардың балалар мен жасөспірімдер арасындағы бұқаралық спортты насихаттау мен дамытуда маңызды рөл атқарары сөзсіз», – деп атап көрсетті.
Турнирге қатысушылар арасында жарыс жолын енді бастағандар да, өздерін республикалық деңгейде жақсы жағынан танытып үлгергендер де баршылық. Сайысқа бақ сынауға келген, панкратионнан ел чемпионатының қола жүлдегері Радмир Асланиди: – Бұл спорт түрімен Қонаев қаласында екі жыл қатарынан айналысып келемін. Біршама нәтижелерге қол жеткіздім. Маған бұл жекпе-жектің түрлі әдіс-тәсілді қолдана беруге болатын әмбебаптығы ұнайды. Осы чемпионаттағы қарсыластарым осал емес. Әрбір айқасты зерттеп, әдістерін жіті бақылап жүрмін. Менің ең басты арманым – әлем чемпионы болу және сол жеңісімді өзімнің жаттықтырушым Талғат Ибрагимовқа арнау, – деп сырын ақтарды.
Екі күн бойы өткен панкратион жарысында спортшылар «элит» және «традишн» бөлімдері бойынша 36 медальді сарапқа салды. Нәтижесінде Қонаев қаласының сайыпқырандары үздік шықты. Олардың қатарында Балтабай Қадір, Рафаэль Азиев, Аслан Әленов, Мейіржан Айтқазинов, Жігер Нарыс, Харлан Аслани, Бақдәулет Саяхат, Әли Нұрболданов, Әмір Сағатбеков, Әмір Серік, Мәжит Реджепов және тағы басқалар бар.
Бейбіт Мекеев,
Қонаев қаласы
