Алматы облысының орталығы Қонаев қаласында бүгін полиция қызметкерлері қала тазалығын сақтау мақсатында рейд жүргізді. Шара барысында қаланың екі тұрғынына абаттандыру ережесін бұзғаны үшін ескерту жасалып, заң талаптары түсіндірілді.
Рейд кезінде Алматинская көшесінің бойында құрылыс қалдықтары төгілген, ашық жатқан бос жер телімі анықталды. Оның иесі Ербол Ермекбаевқа Қазақстан Республикасы Әкімшілік кодексінің 505-бабы, яғни қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру фактісі бойынша ескерту жасалды.
Жер телімінің иесі Ербол Ермекбаев қоқысты өзі төкпегенін айтып ақталды. «Былтыр күзде облысқа президент келеді деп жақын маңдағы көшелерді жөндеп, ағаштарды кескен. Содан шыққан қоқысты тұрғын-үй коммуналдық шаруашылық бөлімінің қызметкерлері сол кезде менің жеріме уақытша төгеміз, ұзатпай алып кетеміз деп ауызша уәде берген еді. Жартысын алып кетті де, жартысы қалды», – деді Ербол Ермекбаев.
Ол рейд кезінде тұрғын-үй шаруашылық бөлімінің үстінен қоқысқа қатысты шағым түсірді. Учаскелік полиция инспекторы Темірлан Сатыбалдинов жер телімі иесіне ескерту жасап, қоқыс тазаланбаса 20 АЕК көлемінде айыппұл салынатынын айтты.
Қаладағы 5-ықшамауданда орналасқан «Питомец» ветеринарлық клиникасының маңайына да түрлі қоқыс тасталған болып шықты. Учаскелік полиция қызметкері дүкен иесіне заң бойынша дүкен айналасын бір тәулік ішінде тазартуға мұрсат беріп, заң талабы орындалмаса оған да 20 АЕК тең айыппұл салынатынын ескертті.
Темірлан Сатыбалдиновтың сөзінше, Қонаев қаласында және Алматы облысы аумағында былтырғы жылдың осы кезеңімен салыстырғанда қалалар мен елді мекендердің аумақтарын абаттандыру қағидаларын бұзу фактілері көбейген. Атап айтқанда, 2022 жылы алғашқы үш айда Әкімшілік кодекстің 505-бабын бұзудың 2969 фактісі тіркелсе, 2023 жылдың тиісті кезеңінде 4413 факт тіркеліп, екі есеге жуық артқан. Ал Қонаев қаласының өзінде қаңтар-сәуір айларында 256 әкімшілік хаттама толтырылған.
Учаскелік полиция инспекторы мұндай рейдтік шаралар күнделікті жүргізілетінін, қаладағы қоғамдық тәртіпті қадағалау тікелей міндеттері екенін айтады.
