1995 жылы 19 қазанда елімізде Мемлекет басшысының №2541 Жарлығымен Төтенше жағдайлар жөніндегі комитет құрылды. Кейіннен бұл құрылым еліміздің қауіпсіздігін қамтамасыз етуге бағытталған Қазақстан Республикасының Төтенше жағдайлар министрлігі болды. Содан бері уақыт талабына сай жасақталған министрлік қыруар жұмыс атқарып келеді. Сенбіде 29 жылдан бері халыққа қалтқысыз қызмет етіп жүрген құтқарушылардың төл мерекесі Қонаев қаласында аталып өтті.
Орталық алаңда ұйымдастырылған салтанатты шараны облыс әкімінің орынбасары Нұржан Құдайбергенов ашты.
– Бүгінде департамент жергілікті атқарушы органдармен бірлесіп, материалдық-техникалық жарақтандыруды нығайту, құтқару бөлімшелерін цифрландыру және кадрлық әлеуетті арттыру бағытында белсенді жұмыс жүргізуде. Қазіргі уақытта әлемдегі оқиғалар өрт сөндіруші және құтқарушы мамандығының қаншалықты сұранысқа ие, құрметті әрі маңызды екенін көрсетіп отыр. Төтенше жағдайлар департаментіне қарасты бөлімдер де өрт сөндіру, апаттың салдарын жою, құтқару жұмысы секілді маңызды міндеттерді абыроймен атқарып жүр, – деген облыс әкімінің орынбасары алдағы уақытта да батылдық пен қаһармандық танытып, қызметтік борышын адал атқаратындарына сенім білдірді. Одан кейін сөз алған облыстық төтенше жағдайлар департаменті ардагерлер кеңесінің төрағасы Мират Қабылов орталық алаңда сап түзеген жеке құрамды кәсіби мерекемен құттықтады.
Сахна төрінде Нұржан Кеңесұлы адам өмірін құтқаруда, табиғи және техногендік сипаттағы төтенше жағдайлардың алдын алу мен жоюдағы қызметі үшін бірқатар азаматқа облыс әкімінің Құрмет грамотасы мен Алғыс хатын табыс етті. Содан соң жиналған жұртшылық халқымыздың қауіпсіздігін бекемдеуге арналған техникалар мен құрал-жабдықтар көрмесін тамашалады. Салтанатты шара әрі қарай Қонаев қалалық Мәдениет үйінде жалғасын тапты. Еліміздің Мемлекеттік Гимні шырқалып, қызметтік борышын өтеу кезінде қаза болған құтқарушылардың рухына тағзым ретінде бір минуттық үнсіздік жарияланды. Бұдан кейін көпшілік назарына төтенше жағдайлар қызметі жайлы бейнематериал ұсынылды.
Кәсіби мерекені жоғары жетістікпен қарсы алып отырған зал толы қауымды құттықтаған облыстық төтенше жағдайлар департаментінің бастығы, полковник Асқар Тойшыбеков уақытпен санаспай, адам өмірін тілсіз жаудан сақтау, табиғи апаттар мен оның алдын алу жолында ерен еңбек сіңірген үздік қызметкерлерге министрлік пен департаменттің марапаттарын табыстады. Келесі кезекте Іле ауданы Өтеген батыр кентіндегі №7 орта мектеп пен №38 мектеп-гимназияның «Жас өрт сөндіруші» әскери-патриоттық сыныбының шәкірттері өз өнерлерін ортаға салып, ән-жырдан шашу шашты.
«Құтқарушы күні мерекесімен барша әріптестерімді құттықтаймын! Еңбегімізді елеп, марапатқа ұсынған басшылыққа алғысым шексіз. Мұндай марапат жұмысқа деген ынтамызды арттырып, жігерлендіреді. Сонымен қатар ізімізді өкшелеп келе жатқан кейінгі буынға да үлгі-өнеге болмақ», – деді шарада сөз алған төтенше жағдайлар департаментіне қарасты кинология бөлімшесінің бастығы Бекзат Өмірзақұлы.
Айжарық КӨПТІЛЕУОВ
Қонаев қаласы
