Жаңа жыл қарсаңында Бөлексаз ауылында Мәдениет үйі пайдалануға беріліп, ауыл тұрғындарының қуанышын еселеді. Ғимарат құрылысы 3 жыл бұрын басталған. Жалпы жоба құны – 279 млн теңге. Шет аумақта орналасқан елдімекенде түрлі мәдени іс-шаралар бұған дейін мектептің шағын залында өтетін. Енді кең сахнада өнер көрсетуге мүмкіндік туды.
Мәдениет үйінің ашылу салтанатында сөз алған Кеген ауданы әкімінің орынбасары Кеңес Қабылбеков:
– Облыс әкімінің қолдауының арқасында ауданның мәдениет саласы соны серпін алды. Қарқара, Жалағаш, Бөлексаз, Жылысай ауылдарында заманауи Мәдениет үйлері салынды. Бүгін пайдалануға берілген жаңа ғимаратта өнердің оты маздап қана қоймай, жастар бос уақытын тиімді пайдаланып, кітапханаға келуіне мол мүмкіндік ашылып отыр. Бұл тұрғындар үшін үлкен қуаныш, – дей келе, «Ауданға сіңірген еңбегі үшін» төсбелгісімен мәдениет майталманы Қызайбай Бейсеновты марапаттады.
Облыстық мәдениет, архивтер және құжаттама басқармасының бөлім басшысы Төлеужан Ғұмаров ауыл жұртшылығын қуанышымен құттықтады. Ардагер-журналист, Қазақстанның мәдениет қайраткері Жақыпжан Нұрғожаев жаңа ашылған Мәдениет үйіне «Жүрегі оның жанартау», «Жетісу жылнамасы», «Кең дүние, төсіңді аш, мен келемін» атты кітаптарын сыйға тартты. Сондайақ салтанатты шарада сөз алған «Өлке тынысы» ЖШС директоры, ақын Кәдірбек Құныпияұлы жерлестеріне игі тілегін жеткізсе, ауыл тұрғыны Бұршақбай Белеков ақсақал ақ батасын берді.
Мәдениет үйінің лентасы салтанатты жағдайда қиылып, ақ жаулықты
аналар шашу шашты. «Сем Шоғы құрылыс сервис» ЖШС қызметкері Қасым Төреев жаңа ғимараттың символикалық кілтін Бөлексаз ауылдық Мәдениет үйінің директоры Берік Рахалиевқа табыстады.
Бұдан соң жиналған көпшілік өнер ошағын аралап көрді. Зәулім ғимаратта домбыра, қолөнер үйірмелері жұмыс істейді. Кітапханасы тағы бар. Әжелер ансамблі де осында орын тепкен. Ауыл өнерпаздары кең сахна төрінде концерттік бағдарлама ұсынып, көрерменге көтеріңкі көңіл күй сыйлады.
Бұл күні өнер ошағының ашылуына орай шағын футболдан өткен финалдық ойын өз мәресіне жетті. Ауыл әкімі Серік Құныпияев қаржылай демеушілік танытқан бәсекеде Кеген командасы І орынды иеленді. Бөлексаз ауылының командасы жүлделі IІ орынды еншілесе, «Бұқаралық спорт» командасы ІІІ орыннан көрінді. Жеңімпаздарға аудан әкімінің дипломы мен арнайы кубогі және ақшалай сыйлықтар табысталды.
Дәурен ӘБУТӘЛІПОВ,
Кеген ауданы
