Мемлекет басшысы Қасым-Жомарт Кемелұлы «Ана тілі» газетінде берген сұхбатында елімізде осы уақытқа дейін атқарылған жұмыстарды саралай келе, алдағы бағыт-бағдарымызды айқындап берді. Саяси, әлеуметтік, экономикалық өзгерістер, халықаралық қатынастар мен оның маңызына тоқталды. «Заң мен тәртіп» қағидатына баса назар аударып, заңнамалық бастамалар мен жаңалықтарды атап өтті. Цифрландыру жүйесі, кәсіпкерлікті қолдау мәселесі, сыбайлас жемқорлыққа қарсы әрекеттер, Атом электр стансасын салу сынды өзекті мәселелерді кеңінен тарқатты. Ел Президенті жастар тәрбиесі мен болашағына шын жүректен тілеулес екенін айта келе: «Реформаның бәрін жастардың игілігі үшін жасап жатырмыз. Бұл – әншейін әдемі сөз емес, мемлекет стратегиясының түпкі мәні» , – деді. Сондай-ақ қазақ тілінің қолданылу аясы мен мәртебесі жөнінде де сөз етіп, мерзімді баспасөздің мән-маңызына тоқталды. Осылайша ел Президенті Қасым-Жомарт Тоқаев маңызды мәселелердің түйткілін түсіндіріп, халыққа терең ой салды деп ойлаймын.
Амангелді Беспаев,
ҚХА жанындағы ақсақалдар кеңесінің төрағасы
