Өткен жылы қазақтың көрнекті жазушысы, балалар әдебиетінің бәйтерегі Бердібек Соқпақбаевтың 100 жылдығы ЮНЕСКО көлемінде аталып өткені баршаға мәлім. Мерейтой аясында туған жерінде қаламгердің еңселі ескерткіші бой көтерді. Кітаптары қайта басылып, оқырмандарға жол тартты. Ұлы тұлғаның есімі әлі де ұлықталып келеді. Жуырда Қонаевтағы орталық саябаққа классик жазушының есімі берілді.
Аталған саябақ күрделі жөндеуден өтіп, 2023 жылы 25 қазанда ресми түрде қолданысқа берілген болатын. Аумағы – 8 гектар. Паркте субұрқақтар, сахна, көрермен орны, дүңгіршектер, түрлі шағын сәулеттік нысандар қойылды. Сондай-ақ күрделі жөндеуден өткізу барысында мұнда қосымша 584 түп ағаш егілген. Спорт жабдықтары орнатылып, футбол алаңы да салынған.
Орталық саябақтағы Б.Соқпақбаевтың орындықта демалып отырған бейнесі мен оның танымал туындысы «Менің атым Қожаның» сәулеттік композициясы келушілерді әдемі әсерге бөлейді. Мұның сыртында қаладағы Центральная көшесіне жазушының есімі берілген.
