Ұйғыр ауданында пластик жәшік өндіретін цех іске қосылды. Күніне 2000 дана жәшік шығаруға қауқарлы цехты кәсіпкер Алимжан Ашимов ашты. Жылдар бойы бағбаншылықпен айналысып келе жатқан Алимжан аудандағы бағбандарға қат дүние осы жәшік екенін анық біледі. Облысымызда бақ өсіруден алдыңғы орында тұрған біздің ауданның бағбандары жыл сайын өрік піскен тұста дәл осы пластик жәшіктің тапшылығын қатты сезінетін. Берісі Алматыдан, арысы Қырғызстаннан тасымалдайтын.
Жуырда ғана жұмысын бастаған цехтың ашылу салтанаты Наурыз мерекесі қарсаңында өтті. Оған Ұйғыр ауданының әкімі Бота Елеусізова қатысып, цехтың жұмысына жоғары баға беріп, өндірістің өркендей беруін тіледі.
Заманауи технологиямен жабдықталған өндіріс өнімнің беріктігі мен экологиялық тазалығын қамтамасыз етеді. Мұнда жәшіктер халықаралық стандарттарға сай құйылып, тасымалдау және сақтау талаптары қатаң сақталады. Тәулік бойы тоқтаусыз жұмыс істейтін құрылғы Қытайдан әкелінген. Әзірге оған қажетті шикізат Ресейден тасымалдануда. Осы істі қолға алған аудандық мәслихат депутаты, кәсіпкер Алимжан Ашимов бұл өзінің көптен бергі арманы болғанын, жобаның жүзеге асуына 50 миллион қаражат жұмсалғанын айтты. Ешқандай мемлекеттің қолдауынсыз ашылған өндіріс орнында әзірге 10 адам жұмыспен қамтылған. Кәсіпкер бұл құрылғы жылына 600 мыңнан астам пластик жәшік өндіруге мүмкіндігі бар екенін, бұл тіпті Ұйғыр ауданының сұранысын да қанағаттандыра алмайтынын алға тартып, болашақта тағы бір құрылғыны алып келіп, іске қосуды жоспарлап отырғанын жеткізді. Осылайша жылдық өнім көлемін 1,2 миллион данаға дейін ұлғайту көзделуде. Сонымен қатар көршілес Панфилов, Еңбекшіқазақ аудандарынан да тапсырыстың қазірдің өзінде түсіп жатқанын жасырмады. Себебі баға басқа қалаларға қарағанда әлдеқайда тиімді болып тұр. Бір жәшікті 200-250 теңге шамасында сатып алуға болады. Ал үшауысыммен 8 сағаттан жұмыс істейтін жұмыскерлер әзірге 150 мың теңге жалақы алады.
Кәсіпкер Алимжан Тохтиұлы алдағы уақытта тек өрік қана емес, алма, құлпынай және көкөніс салатын арнайы жәшіктерді де өндіруді жоспарлап отыр. Өйткені мұндай жәшіктер әрдайым сұраныста. Сонымен қатар шикізатты да алыстан тасымалдамай, еліміздегі пластик қалдықтарын қайта өңдеп, іске асыруға ықпал етпек. Бұл біріншіден – экономикалық тұрғыдан тиімді болса, екіншіден – экологиялық жағынан да пайдалы болмақ.
Цехтың ашылуына келген ауданның ақсақалдары мен аналары ақ батасын беріп, шашуын шашты. «Алик» сауда белгісімен шығып жатқан пластик өнімдер болашақта тек ауданға ғана емес, еліміздің түкпір-түкпіріне тараларына сенім мол.
Анар ДҮЙСЕНБАЙҚЫЗЫ
Ұйғыр ауданы
