Қарасай ауданы Әйтей ауылындағы Бектенбай Қосынов атындағы орта мектепте қазақ халқының ұлттық құндылықтары кеңінен насихатталуда. Мәселен, көркем еңбек сабағында оқушылар қамшы өру техникасын меңгереді. Сабақта және сабақтан тыс уақыттарда ойын түрінде қамшы өру сайысы өткізіледі. Аталмыш жарыс мұғалімдер арасында да ұйымдастырылып тұрады.
Ұлттық тәлім-тәрбиемен сусындап өсіп жатқан мектеп оқушылары облыстық, республикалық жарыстарға қатысып, жүлделі орындарға ие болуда. Мұғалімдер «Сыныптан тыс іс-шараларды ұйымдастырудың тиімді жолдары» атты облыстық семинарда іс-тәжірибесімен бөлісіп, ұлттық құндылықтарымызды бала бойына сіңіруде атқарып жатқан жұмыстарын паш етті.
Қазақ халқының мәдени тұрмысында қамшы ерекше орын алады. Ол – мал айдайтын құрал ғана емес, қастерлі қазына. Ілгеріде қамшысына қарап, адамның тұрмыс-тіршілігін, қандай отбасыдан шыққанын білетін болған. Халқымызда қамшыға қатысты салт-дәстүр көп. Баланы бесікке саларда, қыз айттырғанда да қамшыны қолданған.
Қамшы әбден иленген сиыр терісінен өріледі. Әр өңірде айтулы өрімшілер болған. Олар теріден қамшы, ноқта, шыбыртқыны көркемдеп, таңдай қақтырарлық ұқыптылықпен өрген. Қамшы үш таспадан қырық таспаға дейін өріледі. Таспа неғұрлым көбейген сайын, жіңішкере береді әрі ажарлана, күрделене түседі. Осылай өрілу сапасы мен тәсіліне қарай және қолданылуына орай қамшы атаулары да өзгере береді.
Қазақ халқының ғасырлар бойы ұстаған ұлттық бұйымын жасауды жас ұрпаққа үйретіп, насихаттаса, дәстүріміз жалғасын табатыны сөзсіз.
Ғалымжан ЗЕКЕНОВ
Қарасай ауданы
