Бүгін Үкімет отырысында Премьер-министр Әлихан Смайылов елімізде әуежайлардың айналасындағы жерлер ретсіз пайдаланылып жатқанын айтып, жауапты органдарды сынға алды.
«Әуежайлардың айналасындағы жерлер тұрғын үй құрылысына немесе бизнес нысандарына беріліп, ретсіз пайдаланылуда. Яғни, халықаралық стандарттар сақталмайды. Бұл ұшу қауіпсіздігіне әсер етеді», – деп мәлім етті Үкімет басшысы.
Сонымен қатар, Әлихан Смайылов авиакеросин тапшылығына қатысты мәселеге ерекше тоқталды.
«Біз Үкіметте авиакеросин өндірісін ұлғайту мәселесін бірнеше рет талқыладық. Отандық жанармай қорының жеткілікті болуы Қазақстан арқылы транзитпен өтетін халықаралық авиакомпанияларды тартудың негізгі факторларының бірі саналады. Біз әуе көлігі арқылы жүк тасымалын ұлғайтуға, ұшақтарға қызмет көрсету сапасын жақсартуға мүдделі болуымыз керек», – деді Әлихан Смайылов.
Сондай-ақ Премьер-Министр жолаушылардың отандық әуе компанияларына қатысты рейстердің кешігуі немесе мүлдем ұшпай қалуы сияқты орынды сын-ескертулерді көп айтатынын атап өтті.
«Осы жылдың қаңтар-ақпан айларында Fly Arystan компаниясы Қостанай әуежайынан Астана мен Алматыға ұшуы тиіс рейстердің жартысына жуығын орындаған жоқ. 25 ақпанда дәл осы авиакомпанияның жолаушылары «Астана-Шымкент» рейсінің 10 сағатқа кешігуіне байланысты жанжал шығарды. Ақыр аяғында, ол рейс мүлдем орындалмай қалды. Өкінішке қарай, авиакомпанияларда жолаушылармен тікелей диалог орнату мәдениеті төмен. Рейстердің кешігу себептерін уақытылы түсіндірмейді. Лайықты сервис ұсынылмайды», — деп атап өтті Үкімет басшысы.
