Еліміздe көптеген этнос өкілі бір шаңырақ астында тату-тәтті ғұмыр кешуде. Мәдениеті, дәстүрі мен ана тілін сақтау және дамыту үшін олардың барлығына тең жағдай жасалған. Қонаев қалалық Бердібек Соқпақбаев атындағы сабақта Қазақстан халқы Ассамблеясының 30 жылдығы мен славян жазуы мен мәдениеті күндері аясында өткен «Музыкальная ложка» балалар шығармашылық ұжымдарының І республикалық фестивалі – соның айғағы. Мақсаты – халықшығармашылығын насихаттау, музыкалық өнерді дамыту және этностардың мәдени байланысын нығайту.
Фестивальді ашқан ішкі саясат басқармасының басшысы Ерік Абитов облыстық Ассамблея жанындағы құрылымдар маңызды жобаларды жүйелі түрде жүзеге асырып келе жатқанын атап өтті. Айтуынша, 17 облыстық, 13 аудандық, 4 қалалық этномәдени бірлестік жылдық жоспарларына сәйкес түрлі форматта іс-шаралар өткізуде. Олар өздерінің ғана емес, мемлекеттік тіл мен қазақ халқының мәдениетін, салт-дәстүрін де этнос өкілдеріне үйретіп, насихаттауда.
Ерік Әзілжанұлы сахнада Қазақстан халқының мәдени дәстүрлері мен мұрасын сақтауға және дамытуға, халық шығармашылығын дәріптеуге қосқан үлесі үшін өнер мерекесін ұйымдастыруға атсалысқан азаматтарды марапаттады. Одан кейін сөз алған облыстық Қазақстан халқы Ассамблеясы төрағасының қоғамдық орынбасары Гамзе Гейдаров бүгінгі шарада балалар шығармашылық ұжымдарының өнер көрсетіп жатқаны көңіл қуантатынын айта келе, өскелең ұрпаққа дұрыс тәлім-тәрбие берілсе, ел болашағының да жарқын болатынына тоқталды.
«Балбырауын» күйімен басталған фестиваль барысында Қонаев қаласының «Меруерт» балалар өнер мектебі, Іле ауданы мен Алматы, Алатау қалаларының өнер ұжымдары, облыстық орыс, грек, күрд этномәдени бірлестіктерінің жас өнерпаздары және Жамбыл, Қызылорда, облыстарының балалар шығармашылық ұжымдары өз өнерлерін ортаға салды. Әсіресе, Алматы қаласының «Мечта соседей» ансамблі мен Қызылорда облысының «Надежда» жастар тобының өнері бар ықыласымен сахнаға назар аударған үлкенді-кішілі көрермендерді тәнті етіп, олардың қошеметіне бөленді.
«Қазақстандағы орыс, славян, казак қауымдастығы» ұйымы облыстық филиалының төрағасы Лариса Котельникова бүгінгі фестивальдің жай ғана өнер мерекесі емес, бірлігі жарасқан Қазақстан халқы достығының, ұрпақтар сабақтастығы мен бейбітшіліктің айқын дәлелі екенін баса айтты.
– Ағаш қасық – орыс мәдениеті мен мәдени дәстүрлеріміздің бірегейлігінің көрінісі. Бұл – ас құралы ғана емес, орыстың ұрмалы музыкалық аспабы. Ол бізге ғасырлар тереңінен келді. Еліміз бойынша тұңғыш рет өткізіліп отырған фестивальға өскелең ұрпақтың қызығушылық танытқанына қуаныштымын. Келесі жылы республикалық байқау түрінде өткізу жоспарланып отыр, – деді Лариса Леонидовна.
Бүгін өтіп жатқан «Музыкальная ложка» республикалық фестиваліне Іле, ауданынан, Қызылорда мен Жетісу облыстарының жеткіншектері белсене қатысуда. Қазақстан халқы Ассамблеясының 30 жылдығы шеңберінде Ассамблеяның алдағы уақытта да осындай шараларды өткізу жоспарында бар, – деді облыстық «Ассамблея жастары» қоғамдық бірлестігінің төрағасы Вера Плетнева.
Шара соңында белсене қатысқан өнерпаздар мен ұжымдарға «Қазақстандағы орыс, славян, казак қауымдастығы» ұйымы облыстық филиалының дипломдары мен Алғыс хаттары табысталды.
Айжарық КӨПТІЛЕУОВ
