Жамбыл ауданы Қарғалы ауылының тұрғындары қоршаған ортаны тазалау жұмысына белсенді қатысады. Экологтар күніне орай олар кезекті сенбілікке шығып, елдімекенді қақ жарып өтетін Ұзынқарғалы өзенінің бойын қоқыстан тазартуға біркісідей жұмылды. «Таза жағажай – таза өзен» акциясына 100 шақты адам қатысып, 6 шақырым жерден 3 тоннадан астам қоқыс шығарылды.
Табиғатты аялау және қоғамда экологиялық мәдениет қалыптастыруды басты мақсат еткендердің қатарында аудан әкімдігі мен мәслихатының өкілдері, «АМАNАТ» партиясының белсенділері, аудандық ақсақалдар және аналар кеңестерінің мүшелері, мұғалімдер мен медицина қызметкерлері болды. Атап айтқанда, аудандық ішкі саясат бөлімінің басшысы Айткүл Медеуова, жергілікті мәслихат депутаты, кәсіпкер Паша Чумаев, Қарғалы ауылдық округі әкімінің орынбасары Қуаныш Батырбаев, аудандық ақсақалдар кеңесі төрағасының орынбасары Исмаилжан Иминов, Қарғалы ауылдық аналар кеңесінің төрағасы Зияш Смағұлқызы қатысты. Жастар көптеп тартылған шараның мақсаты – тау өзенінің жағасын таза ұстап, судың ластануына жол бермеу, қоғам назарын қоршаған ортаны қорғауға аудару. Өйткені мұнда жаз айларында демалушылар көптеп келеді.
Қазір Қарғалы шатқалына жергілікті тұрғындардан бөлек, облыстың әр өңірі мен Алматы қаласынан келетіндер қарасы көбейді. Сарқыраған өзен бойында демалыс күндерін өткізушілердің арасында пайдаланған заттарын жинамай, қоқыс шашып кететіндер жиі кездеседі. Соның салдарынан олардың соңында пластик құтылар мен қағаз қалдықтары қалады. Табиғат жанашырлары тұрмыстық қалдықтарды жинау арқылы, экологиялық мәдениет қалыптастыруды іс жүзінде осылай насихаттайды. Мұндай сенбілікті ауылдық әкімдік қызметкерлері мен ерікті жастар жүйелі түрде өткізеді. Алайда арнайы қоқыс жәшіктері қойылғанына қарамастан, отырған жерін ластап кететін жауапсыз адамдар тыйылмай отыр. Сондықтан қоғам белсенділері мен табиғат жанашырлары бұған тиісті шара қолдану керек, айыппұл салу арқылы ғана тәртіп орнатылады деген пікірде.
– Ұзынқарғалы өзенінің бойына жұма, сенбі, жексенбі күндері адамдар жан-жақтан көптеп келеді. Олардан кейін шашылған заттарды жинастыруға тура келеді. Табиғат аясына шыққандарды тазалық сақтауға шақырамын, – деді Қарғалы ауылдық округі әкімінің орынбасары Қуаныш Батырбаев.
Серік САТЫБАЛДИЕВ
Жамбыл ауданы
