Ұлттық домбыра күні – 2018 жылдан бері шілденің алғашқы жексенбісі қазақтың төл аспбының күні ретіне тойланып келеді. Биыл бұл күн 6 шілдеге сәйкес келеді. Ұлттық домбыра күні мен оның қарсаңында еліміздің әр аймағында жүздеген адам бір мезетте домбыра тартып, ұлттық өнер мұрасын дәріптейді.
Домбыра жер бетінде кеңінен тараған шертпелі аспаптардың қатарына кіреді. Өнертанушылар мен тарихшылар мұндай аспаптар ғылымда Х ғасырдан бастап белгілі деп тұжырымдайды. Алматы облысының әкімі Марат Сұлтанғазиев атаулы күнге орай облыс тұрғындарын құттықтады.
“Құрметті жерлестер!
Сіздерді Ұлттық домбыра күнімен шын жүректен құттықтаймын!
Домбыра – қазақ халқының жаны мен жүрегінің үні, рухани мұрамыздың алтын арқауы. Еліміздің мәдени құндылықтарының бірі ретінде ол ғасырлар бойы ұрпақ тәрбиесінің, ел бірлігінің және рухани сабақтастықтың символына айналды.
Алатаудың баурайындағы өнер мен мәдениетке бай Алматы облысы – күй өнерінің қанатын кеңге жайған киелі өңір. Бүгінде облыс аумағында ұлттық өнерді дәріптейтін домбыра мектептері жұмыс істейді. Күй фестивальдері мен жас өнерпаздарды қолдау шаралары тұрақты түрде ұйымдастырылып келеді. Бұл – ата-баба мұрасын көздің қарашығындай сақтап, келер ұрпаққа аманаттауға бағытталған игі істердің айқын көрінісі.
Ұлттық домбыра күні – төл өнерімізді асқақтатып, мәдениетімізді мәйекті ететін ерекше мереке. Осы айтулы күн әр шаңыраққа шаттық пен береке әкелсін!
Ұлттық мәдениетіміз мәңгі жасай берсін! Күй өнері шарықтап, киелі аспабымыз – домбыра әр үйдің төрінен табылсын!
Құрметпен,
Алматы облысының әкімі
Марат Сұлтанғазиев
