Қонаев қаласында облыстық қоғамдық келісім және даму орталығының ұйымдастыруымен Қазақстан халқы Ассамблеясының 30 жылдығы мен «Елдесу және татуласу» жобасы аясында кәсіби медиаторларды оқыту курсы өтті. Мақсаты – этносаралық қатынастар саласындағы тұрақтылықты қамтамасыз ету, қоғамдағы даулы жағдайларды сотқа дейін бейбіт жолмен шешу тәсілдерін меңгерту, медиативтік әдістерді тәжірибе жүзінде қолдану арқылы кәсіби біліктілікті арттыру.
Оқыту курсына Қазақстан халқы Ассамблеясының мүшелері, облыстық мәслихат жанындағы депутаттық топтың өкілдері, этномәдени бірлестіктердің төрағалары, білім беру және ішкі істер саласының қызметкерлері, қоғамдық медиаторлар, ақсақалдар мен аналар кеңесінің мүшелері қатысты. 5 күнге созылған курс барысында ҚХА жанындағы медиация кеңесінің төрағасы, кәсіби медиатор Шерзод Пулатов, ҚХА жанындағы медиация кеңесінің мүшесі, кәсіби медиатор Әсет Абжақов, психология ғылымдарының магистрі, тренер Гүлмира Нарбаева, медиатор, коуч, жаттықтырушы Резеда Баймухаметова, психолог, медиатор Гүлжан Қажахметова сынды тәжірибелі спикерлер дәріс оқыды.
Қатысушылар этносаралық келісім мен қоғамдық тұрақтылықты сақтауда ерекше рөл атқаратын этномедиация саласы бойынша теориялық және практикалық білім алды. Сонымен бірге медиативтік дағдыларды меңгеріп, тиімді қарым-қатынас пен даулы жағдайларды мәдениетаралық негізде шешудің жолдарымен танысты.
Өңірдегі этносаралық келісім бағытындағы барлық бастамаларға жетекшілік етіп жүрген облыстық ішкі саясат басқармасының басшысы Ерік Абитовтың осынау маңызы зор іс-шараның жоғары деңгейде өтуіне қолдау көрсеткенін атап өткен жөн.
Курс соңында қатысушыларға кәсіби медиатор ретінде қызмет ету құқығын растайтын сертификаттар мен куәліктер табысталды. Олардың алған білімдері облыс аумағында татулық пен тұрақтылықты сақтау жолында нақты нәтижелерге жеткізетініне сенімдіміз.
Облыс орталығындағы оқыту курсы мәресіне жеткеннен кейін облыстық қоғамдық келісім және даму орталығының ұйытқы болуымен Қарасай, Жамбыл, Ұйғыр, Еңбекшіқазақ, Талғар аудандарында «Елдесу және татуласу» жобасы аясында «Этномедиация келісім аумағы» тақырыбында семинар-тренинг өткізілді.
Аудан әкімдігінің өкілдері, учаскелік инспекторлар, білім беру саласының қызметкерлері, қоғамдық медиаторлар, аудандық ҚХА құрылымдары өкілдерінің қатысуымен өткен семинар-тренингті ҚХА жанындағы медиаторлар кеңесінің төрағасы Шерзод Пулатов пен практик-психолог, педагогика және психология ғылымдарының магистрі, ҰҚК-нің аға оқытушысы Ақмарал Абдукеева жүргізді.
Айжарық КӨПТІЛЕУОВ
