Абай облысындағы орман өртін сөндіруге көмекке барған Алматы мен Қарағанды облыстарының төтенше жағдайлар департаменті күштері мен техникалары өз өңірлеріне қайтты деп хабарлады Абай облысының әкімдігі.
Төтенше жағдайлар министрі Сырым Шәріпханов өрт сөндірушілерге төтенше оқиғада көрсеткен ержүректігі мен батылдығы, жоғары кәсіби қызметі үшін алғыс білдірді.
Өрт сөндіру мен оның салдарын жою жұмыстарымен одан әрі Экология және табиғи ресурстар министрлігінің орман өрт станциялары, ТЖМ өрт сөндіру бөлімшелері және әуе кемелері айналысады. Өрт толық сөндірілгенге дейін оқшауланған өрт ошақтарына тұрақты түрде су төгіліп, сондай-ақ өрттің жиегін топырақпен жабылады.
Абай облысының “Семей орманы” резерватында өрт 8 маусымда басталған. Өрттен 14 орманшы және өрт сөндіруге шыққан бір тұрғын қаза тапты. 14 маусымда ТЖМ өрт аумағы оқшауланғанын хабарлаған.
