Ата Заң аясында құжат рәсімдеуде, мүлікке құқық бекітуде, азаматтар арасында мәміле жасауда нотариус қызметінің атқаратын міндеті зор. Кеген ауданында да осы саланың білікті мамандары аз емес. Өзінің кәсіби шеберлігінің арқасында халық сеніміне ие болған нотариустың бірі ретінде Жалғасбек Әділбековті айтуға болады. Ол ауыл тұрғындарының құқықтық мәдениетін арттыруға өз үлесін қосып келеді.
Жалғасбек Жеңісұлы 1981 жылы Нарынқолда дүниеге келген. 2001 жылы Алматыдағы Технология және бизнес университетінің «Кеден ісі» мамандығын тәмамдайды. Сол жылы Қазақстан Республикасы Ұлттық қауіпсіздік комитеті Шекара қызметінің №2017 әскери бөлімінде Отан алдындағы борышын өтеуге шақырылады. Әскерден аға сержант шенімен оралған соң, еңбек жолын 2003 жылы «Айым Фарма» ЖШС-да бастайды. Әртүрлі салада қызмет етіп, 2014 жылдың тамыз айында «Райымбек ауданы әкімінің аппараты» мемлекеттік мекемесінде төтенше жағдайлар жөніндегі бас маманы, 2018 жылдың тамыз айынан 2019 жылдың маусым айына дейін Нарынқол ауылдық округінің әкімі болды. Қазіргі таңда жеке нотариус ретінде халыққа қызмет көрсетуде. Облыстық нотариалдық палатасының басқарма мүшесі.
Жалғасбек Жеңісұлының сөзінше, бұл қызмет зор жауапкершілікті талап етеді. Адамдардың тағдыры кейде бір қолтаңбаға байланысты болуы мүмкін. Сондықтан әр істі жан-тәніңмен саралап, заң шеңберінде шешуге тырысу – нотариустың басты қағидасы.
– Конституциямыздың қабылданғанына биыл 30 жыл толады. Заң алдында бәрі тең. Ата Заң аясында көпшілікке заңдық тұрғыдан кеңес беріп, заң қағидаттарын түсіндіреміз. Нотариус тек құжаттарға қол қоятын маман емес. Шын мәнінде, ол – заң мен азаматтың арасын жалғап тұратын құқықтық кеңесші, кей жағдайда делдал, тіпті даулы жағдайлардың алдын алушы. Нотариус бір тараптың мүддесін қорғамауы керек. Ол – бейтарап тұлға. Қандай мәміле болмасын, екі тарапқа да заң аясында тең қарайды. Біз құпияны сақтауға міндеттіміз. Яғни, азаматтардан түскен ақпарат ешқайда жария етілмейді. Соңғы жылдары цифрландыру үдерісі нотариат саласына да ене бастады. Қазір еліміздің көптеген аймағында электронды нотариат жүйесі жолға қойылып келеді. Бұл – уақытты үнемдеудің, қағазбастылықтан арылудың және заңдық рәсімдердің ашықтығын арттырудың тиімді тәсілі, – дейді Жалғасбек Әділбеков.
Ол үнемі ізденіс пен жаңашылдықтың арқасында кәсіби біліктілігін шыңдап келеді. Күн сайын ондаған азаматтың құқықтық мәселесін шешіп, олардың құжаттық рәсімдеу жұмыстарын заң аясында жүргізуге атсалысуда. Ал тұрғындар оның ұқыптылығы мен жұмысына деген жауапкершілігін жоғары бағалайды.
Бүгінге дейін мінсіз қызметі үшін бірнеше Мақтау грамотасы мен Алғыс хат иеленген. Десек те, Жалғасбек Жеңісұлы үшін басты марапат – халықтың сенімі.
Дәурен ӘБУТӘЛІПОВ
Кеген ауданы
