Елімізде 2 ақпан – Ұлттық басылым күні болып белгіленді. Бұл туралы ақжолтай жаңалықты Ақпарат және қоғамдық даму министрі Дархан Қыдырәлі Facebook желісінде хабарлады.
«Жағымды жаңалығымыз бар. 2 ақпан – Ұлттық басылым күні болып бекітілді. Бастауында Ахмет Байтұрсынұлы, Әлихан Бөкейханов, Міржақып Дулатұлы секілді ұлт зиялылары тұрған “Қазақ” газетінің алғашқы нөмірі осыдан 110 жыл бұрын, 2 ақпан күні жарық көргені белгілі. Алаш ардақтыларының қолтаңбасы қалған газет ұлттық ренессанстың қайнар көзіне айналып, халқымыздың ақыл-ойын, сана-сезімін бөлек арнаға бұрды» деп жазды министр желідегі өз парақшасында.
2 ақпанды Ұлттық басылым күні деп белгілеу жөнінде ұсыныс бұған дейін айтылып келген еді. БАҚ қызметкерлері күні қарсаңында Елордадағы Ұлттық музейде өткен қазақ журналистикасының өткені мен бүгініне қатысты көрмеде Дархан Қыдырәлі министрлік аталған ұсынысты қолдап, тиісті жұмстар атқарғанын айтқан. Министр журналистика күнінен бөлек, 2 ақпан баспасөз саласында жүрген әріптестер кәсіби мереке ретінде атап өтетінін айтқан.
Бұған дейін Қазақ радиосының құрылғанына 100 жыл толуына орай 1 қазан Радио қызметкерлері күні деп ресми түрде бекітілген еді. Осымен елімізде БАҚ қызметкерлеріне арналған тағы бір кәсіби мереке белгіленіп отыр.
Министр жазбасын «Баспасөз саласында еселі еңбек етіп, қалам тербеп жүрген барша әріптестерімізді ұлттық баспасөз күнінің белгіленуімен құттықтаймын!» деп аяқтаған.
Ұлттық баспасөз күні көршілес Ресей, Қырғызстан, Тәжікстан, Әзербайжан елдерінде де атап өтіледі. Атаулы мереке бұл елдерде алғашқы газеттердің жарық көрген күні баспасөз күні, БАҚ қызметкерлері күні ретінде белгіленген.
