Бүгін Қонаев қаласындағы «Heaven club» демалыс аймағында ашық суда жүзуден «Oceanman Kazakhstan» – 2023 халықаралық жарысы басталды. Аталған спорттық шара Астананың 25 жылдық мерейтойына орай ұйымдастырылды.
Жарыстың ашылу салтанатында Алматы облысының әкімі Марат Сұлтанғазиев және суда жүзуден Рио Олимпиадасының чемпионы Дмитрий Баландин сөз сөйлеп, қатысушыларға сәттілік тіледі.
«Oceanman Kazakhstan» халықаралық жарысын жаңадан гүлденіп келе жатқан Қонаев қаласында өткізу біз үшін үлкен мәртебе. Бұл спорттық шара облыста осымен екінші рет ұйымдастырылып отыр. Былтыр Қапшағай жағалауында жарысты тамашалуға 3000 қонақ жиналып, дүбірлі дода өткен еді.
Алматы облысы еліміздегі спорттық белсенді аймақ деп айтуға толық негіз бар. 2022 жылы өңірде 500-ден астам халықаралық және республикалық деңгейде жарыс өтті. Болашақта Қонаев қаласы жағажай және су спорты түрлерінің орталығына айналады деп сенеміз. Халықаралық шаралар туризмнің дамуына зор үлесін қосады, – деді облыс әкімі Марат Сұлтанғазиев.
Аталған жарыс ең алғаш рет 2015 жылы Испанияда жалауын көтерген. Бүгінгі таңда «Oceanman» 15 мемлекетте тұрақты өтіп келеді.
Биылғы шараға 20 елден 1800 адам жарысқа қатысуға келген. Бірінші күні 5 шақырым қашықтыққа 750 адам жүзеді. Ал ертең «SPRINT 1,5 км» және «OCEANKIDS 800 м» кезеңдері өтеді.
Жарысты ұйымдастырушылар: ҚР Мәдениет және спорт министрлігі, Алматы облысы дене шынықтыру және спорт басқармасы, облыстық бұқаралық-спорттық шараларды өткізу орталығы, «Kazakh Tourism» ұлттық компаниясы және «Oceanman Kazakhstan» қоғамдық қоры.
