Еліміз көлемінде «Зорлық-зомбылықсыз 16 күн» республикалық акциясы өтіп жатқаны белгілі. Акция Талғар ауданында да бастау алып, орталық алаңға аудан жастары мен тұрғындар жиналды.
Көпшілік алдында Талғар аудандық полиция басқармасының қоғамдық қауіпсіздік бөлімі отбасылық-тұрмыстық зорлық-зомбылықпен күрес бөлімінің бастығы, полиция майоры Арайлым Қасымбекова сөз алып, аталмыш акцияның маңыздылығына тоқталды.
Полиция өкілінің айтуынша, өткен жылдың өзінде ауданда әйелдер мен балаларға қатысты 18 қылмыс тіркелген. Бұл сандардың артында талай отбасының тағдыры, үлкен үрей мен қорқыныш тұрғаны сөзсіз. Сол себепті де ол жауапкершілік тек полицияға ғана жүктелмейтінін ерекше атап өтті. Қоғам дабыл белгілерін дер кезінде байқап, қиын жағдайға тап болғандарға қолдау көрсетуі тиіс.
Маңызды шараның ашылу салтанатына жиналған жастар бұл пікірге қолдау білдіріп, бәрі бірдей зор дауыспен: «Зорлық-зомбылыққа жол жоқ!» – деп үн қосты.
Алдағы уақытта акция аясында ауданда тұрғындармен кездесулер, тренингтер өтіп, түсіндіру жұмыстары жүргізіледі. Еріктілер мен құқық қорғау қызметкерлері ақпараттық материалдар таратып, баннерлер орнатады, отбасылық кикілжіңдердің алдын алу және қиыншылыққа тап болғандарға қолдау көрсету бойынша да іс-шаралар қолға алынады.
«Гендерлік зорлық-зомбылыққа қарсы белсенді іс-қимылдың 16 күні» республикалық науқаны 10 желтоқсанға дейін жалғасады. Талғар ауданында диалог алаңдарынан көрмелерге дейін 20-дан астам іс-шара жоспарланған. Бұл шараларды жүзеге асыруда әйелдер мен балаларды қорғау, жастар арасында өзара құрмет пен зорлық-зомбылықсыз орнықты қарым-қатынас мәдениетiн қалыптастыру басты назарда болады.
Құтмағамбет ҚОНЫСБАЙ,
Талғар ауданы
