Қарасай ауданындағы «Nur-Aman» спорт кешенінде Тәуелсіздік күніне орай жасөспірімдер арасында қазақ күресінен республикалық турнир өтті. Бұл жарыс еліміздің 10 аймағынан келген 2010-2011 жылы туған 180-нен астам спортшының басын қосып, ауқымды спорттық мерекеге айналды.
Жас балуандар 10 салмақ дәрежесі бойынша бозкілемге шықты. Әрбір белдесу тартысқа толы болды. Турнирдің мақсаты – талантты спортшыларды анықтап, қазақ күресін жас буын арасында кеңінен насихаттау.
«Жігіттер жақсы физикалық дайындықпен келді. Кейбір белдесулер ересектер арасындағы жарысты еске салды», – деді турнирдің бас хатшысы Қуанжан Күлпейісов.
Алматы облысының намысын республикалық және халықаралық жарыстарда қорғап жүрген жасөспірімдер құрамасы негізінен Балқаш, Қарасай, Жамбыл, Кеген және Іле ауданы спортшыларынан құралған. Аталған жарыстың қорытындысы бойынша үш алтын медальды облыстағы спорт мектептерінің тәрбиеленушілері жеңіп алды. Чемпион атанғандар – Дарын Есімханұлы, Амантұр Нұрасыл және Ердана Мұратәлі.
«Жарыста қарсыластар мықты болды. Турнирде жеңіске жеткеніме өте қуаныштымын. Қазақша күреспен 5 жылдан бері айналысамын. Осыған дейін көптеген облыстық және республикалық жарысқа қатысып, жүлделі орындарға ие болдым. Жеңімпаз болу үшін көп еңбектену қажет. Мені шыдамдылыққа және алға сеніммен қарауға үйреткен жаттықтырушыма алғыс айтамын», – деді 60 келі салмақ дәрежесінде чемпион атанған Нұрасыл Амантұр.
Спортшылар құрама қоржынына тағы үш күміс және сегіз қола медаль салды. Осы нәтиженің арқасында Алматы облысы жалпыкомандалық есепте алдыңғы қатардан көрінді.
Өз тілшіміз
Қарасай ауданы
