Еліміздің алты өңірінде астық жинау науқаны басталып, осы күнге дейін 638,8 мың га астық алқабы орылды. Егін жинау науқаны Алматы, Жетісу, Жамбыл, Түркістан, Абай, Қызылорда, Батыс Қазақстан, Шығыс-Қазақстан облыстарында, сондай-ақ Шымкентте басталды.
Ауыл шаруашылығы министрлігінің хабарлауынша, республиканың барлық өңірінде жаппай егін жинау тамыздың үшінші онкүндігінде басталып, қарашаға дейін жалғасады. Қазіргі күнге дейін жиналған астықтың орташа түсімі гектарына 14 центнерді құрап, 1079,6 мың тонна астық бастырылды.
Астық жинау науқанына 426 мың тонна арзандатылған дизель отынын бөлу жоспарланған. Бүгінгі таңда 78,2 мың тоннасы төленіп, шамамен 45,7 мың тоннасы дихандарға жөнелтілді.
Биыл Энергетика министрлігі уәкілетті орган ретінде мұнай өңдеу зауыттарынан дизель отынының сату бағасын тоннасына 284 мың теңге деп бекітті. Жеткізуші операторлардың шығындарын ескере отырып, фермерлер үшін орташа баға нарықтағы құнынан 9 пайызға төмендетіліп, литріне 269 теңге сомасында белгіленді.
Ауыл шаруашылығы министрлігі еліміз элеваторларының сыйымдылығы 29,9 миллион тоннаны құрайтынын, яғни биыл жиналады деп болжанып отырған астықты шашауын шығармай сақтауға жеткілікті екенін айтады.
