Ақтастыдағы Наурыз тойы

Кеген ауданының Ақтасты ауылында Наурыз мерекесі ерекше ұйымшылдықпен өтті. Ауыл тұрғындары үш киіз үй тігіп, Береке, Татулық, Ынтымақ ауылдарына бөлінді. Киіз үй салт-дәстүрімізге сай безендіріліп, ұлттық бұйымдардан көрме ұйымдастырылды.
Наурыз мерекесіне жайылған дастарқандағы дәмдердің молдығы да ауылдың ауызбіршілігі мен аста-төк берекесін білдіріп жатты.
Әр ауыл көрсеткен тұсау кесу, бесікке салу, сүндетке отырғызу дәстүрлері арқылы ұлттық құндылықтарымыз дәріптелді.
Ерекше әсемделген аттарға мінген бозбалалар, ұлттық киім киген әсем бойжеткендер мерекеге сән кіргізді.
Ұлттық ойындар асық ату, батпан көтеру, қол күрес айрықша тартыспен өтіп, мықтыларға ақшалай сыйлықтар үлестірілді.
Арнайы құрылған комиссия үш ауылдың өнерлерін сарапқа салып, барлығының асқан қызығушылығымен бар мүмкіндікті пайдаланып, тамаша өнер көрсеткендері үшін тең бағалап, ауыл азаматы, кәсіпкер Құрманов Айдар Жанатұлының демеушілігімен Береке, Татулық, Ынтымақ ауылдарына қаржылай сый ұсынды.
Жыл қорытындысына сай, ауылда өз еңбектерімен елеулі болған он азаматты ауыл әкімі Ерболат Төребаев Мақтау қағазымен марапаттап, Наурыз мерекесін жоғары деңгейде ұйымдастырған Ақтасты ауылдық клубының меңгерушісі Жандос Асановқа алғысын білдірді.
Дәурен ӘБУТӘЛІПОВ
Кеген ауданы