Абай күні облыс орталығы Қонаев қаласында да салтанатпен аталып өтті.
Мемлекеттік мекеме қызметкерлері, ақсақалдар, зиялы қауым өкілдері, қоғамдық бірлестік төрағалары, ұстаздар, оқушылар, қала тұрғындары мен қонақтары ұлы ақынға орнатылған ескерткішке гүл шоқтарын қойып, рухына тағзым етті.
«Абай Құнанбайұлы – қазақ руханиятындағы ең жарық жұлдыздың бірі де бірегейі. Хакім артына өшпес мұра қалдырды. Оның жауһар поэзиясы, даналық сөздері өнеге мен тәлім-тәрбие. Абайдың асыл сөздерін жүректерге тоқыған ұрпақтың келешегі кемел болады. Ұлы ақынның рухы қолдасын», – деді облыстық мәдениет, архивтер және құжаттама басқармасының бөлім басшысы Төлеужан Нүсіпжанұлы.
Келесі кезекте Қазақстан Жазушылар одағы Алматы облыстық филиалының басшысы Қанат Әбілқайыр жиналған жұртты мерекемен құттықтап, ақжарма тілегін арнады. Жергілікті ақын Берік Байлов Абайға арнаған өлеңін оқып, көрермендерді бір серпілтті.
Сонымен қатар, «Kinoman» өнер орталығының шәкірттері Айзере Бақберген «Сенбе жұртқа тұрса да қанша мақтап», Айғаным Амангелді «Қыс» атты ақынның жырларын жатқа оқып, мерекелік шараның көрігін қыздырды.
«Абай күнін» мерекелеу аясында орталық алаңда облыстық Сүйінбай атындағы филармония мен «Алатау әуендері» ансамблінің концерттік бағдарламасы көпшілік назарына ұсынылды.
Айжарық КӨПТІЛЕУОВ
