Бұл туралы сәулет және қала құрылысы бөлімінің басшысы Алишер Байдуанов айтты. Оның мәліметінше, қала келбетін жақсарту мақсатында түрлі бағыттар бойынша жұмыс жүргізілуде. Мысалы, Қонаев бойынша жасалған мониторинг нәтижесінде 25 заңсыз орнатылған жарнама алынып тасталды.
Ал дизайн-кодқа сәйкес келмейтін нысан иелеріне қалпына келтіру қажеттілігі жайында 36 хабарлама беріліп, орындалуы бақылауға алынды. Ескірген шағын сәулеттік нысандарды жаңарту, құрылыс аймақтарын уақытша баннерлермен қоршау сияқты жұмыстар күнделікті атқарылуда. Қонаевта абаттандырылмаған жаяу жүргіншілер жолдары да кездеседі. Ол аумақтар бойынша бөлек жоба жасалып, қарастырылуда.
«Былтыр демеушілер есебінен саяжайлардың бірінде, Абай және Соболев көшесінде балалар ойын алаңы мен аллея салынды. Биылдан бастап демеушілер есебінен ғимараттар жарықтандырылуда. Осы уақытқа дейін орталық мешіттің, қала кіреберісіндегі 9 қабатты тұрғын үйдің қасбеттері және стела жарықтандырылды. Алдағы уақытта Алматы көшесінің бойындағы ғимараттарды жарықтандыру жоспарлануда», − деді Алишер Байдуанов.
