Балқаш ауданының әкімі Азат Құтпанбетов бірқатар шаруашылықты аралап, арпа-бидай егу жұмысы жайын бағамдады. Өңір басшысы өзінің іссапарын Береке ауылдық округіне қарасты «Тамшыбұлақ» жауапкершілігі шектеулі серіктестігінен бастады.
Серіктестік төрағасының орынбасары Қамқор Уәлиев шаруашылыққа тиесілі 3161 гектар суармалы жердің 500 гектарына күріш, 300 гектарына бидай, 200 гектар жерге сұлы және қалған суармалы алқапқа көпжылдық шөп егуді жоспарлап қойғандарын айтты.
Шаруашылықта қазіргі таңда 200 гектар егіс алқабына сұлы дақылын егу жұмысы аяқталған. Ал 300 гектар жерге егілетін бидай дақылының 100 гектарына алтын дән сіңіріліп үлгерген.
Жалпы айтқанда, «Тамшыбұлақ» ЖШС көктемгі дала жұмыстарын атқаруда 30 адамды жұмыспен қамтып отыр. Сонымен қатар дала төсін дүбірге бөлеген науқанға он екі «МТЗ-80» және алты «МТЗ-1221» тракторлары, төрт тұқым сепкіш, төрт жер тегістегіш және төрт соқа, тағы басқа қажетті техникалар пайдаланылуда. Аудан басшысы «Тамшыбұлақ» ЖШС директорының орынбасары Қамқор Уәлиевке ел игілігі үшін атқарылып жатқан жұмыстарды дер кезінде аяқтауды және еңбектің қарақазанын қайнатып жатқан диқандардың еңбегін лайықты бағалауды тапсырды. Мұнан соң «Бауыржан-7» ЖШС-ға атбасын бұрып, ол жерде де егін егу науқаны барысымен танысты. Сапар аясында аудан әкімімен орынбасары Асқар Қадірұлы, ауыл шаруашылығы бөлімінің бас маманы Әлібек Бөпешбаев, жер қатынастары бөлімінің басшысы Ғалым Нарбаев бірге жүрді.
Бақтығали ДӘУІТБАЙ
Балқаш ауданы
