Қазақстан Республикасының Үкіметі мен Моңғолия Үкіметі зейнетақыларды тағайындау және төлеу мәселелері бойынша ынтымақтастық аясында келісім жасасқан болатын. Ол 2026 жылғы 1 сәуірден бастап күшіне енді. Құжатқа 2024 жылғы 29 қазанда Ұлан-Батыр қаласында қол қойылған және Қазақстан Республикасының 2026 жылғы 9 ақпандағы Заңымен ратификацияланған.
Келісім екі ел азаматтарына зейнетақы тағайындау мен төлеу тәртібін реттеуге, сонымен қатар басқа мемлекет аумағында жинақталған еңбек өтілін есепке алуға мүмкіндік береді. Бұл ретте еңбек өтілін өзара есепке алу, әскери қызмет, жоғары немесе жоғары оқу орнынан кейінгі және арнаулы орта білім беру ұйымдарында оқыған кезеңдерді еңбек өтілі ретінде енгізу қарастырылған. Келісімде сондай-ақ Қазақстан мен Моңғолия арасындағы жинақтаушы зейнетақыны экспорттау бойынша ынтымақтастықтың жаңа түрі көзделген.
Жасына байланысты зейнетақы төлемдерін алушы 1998 жылғы 1 қаңтарға дейін жасына байланысты зейнетақы төлемдерін тағайындау үшін бұрын ұсынылған құжаттарды толықтыратын еңбек өтілі туралы құжаттарды ұсынған кезде жасына байланысты зейнетақы төлемдерінің мөлшерін өзгерту («Мемлекеттік базалық зейнетақы төлемінің, жасына байланысты зейнетақы төлемдерінің мөлшерін есептеу (айқындау), оларды тағайындау, жүзеге асыру, тоқтата тұру, қайта есептеу, қайта бастау, тоқтату және тағайындау (тағайындаудан бас тарту) туралы шешімді қайта қарау қағидаларын бекіту туралы» Қазақстан Республикасы Премьер-Министрінің орынбасары – Еңбек және халықты әлеуметтік қорғау министрінің 2023 жылғы 22 маусымдағы №232 бұйрығы) қағидалардың 22, 23 нысандарына сәйкес өтініш берілген күннен бастап жүргізілген арттыруларды ескере отырып, тағайындау жөніндегі уәкілетті органның шешімі негізінде жүзеге асырылады.
Қағиданың 6-тармағының 3) тармақшасына сәйкес Қазақстан Республикасынан тыс жерлерде берілген құжаттар, егер Қазақстан Республикасы ратификациялаған халықаралық шарттарда өзгеше көзделмесе, Қазақстан Республикасының заңнамасында белгіленген тәртіппен жария етуге жатады.
Келісімнің арқасында екі ел азаматтарының құқықтық сенімділігі мен әлеуметтік қорғалуын қамтамасыз ететін еңбек өтілі мен трансшекаралық зейнетақы төлемдерін жинақтаудың ашық тетігі енгізіледі.
Қарлығаш Естеуова,
ҚР ЕжХӘҚМ Халықты әлеуметтік қорғау саласындағы
реттеу және бақылау комитеті Алматы облысы бойынша департаменті №1 зейнетақы және әлеуметтік
қамсыздандыру бөлімінің басшысы
