Алматы облысының Еңбекшіқазақ ауданына қарасты Саймасай ауылында газ құю станциясында өрт болып, екі адам зардап шекті. Төтенше жағдайлар министрлігінің хабарлауынша, оқыс оқиға 19 тамыз күні сағат 17:50-де басталған. Рысбеков көшесі 1а мекенжайында орналасқан газ құю станциясында газ баллоны жанып, аумағында орналасқан сақтау және сатуға арналған контейнерден жасалған қоймаға көшкен.
40 шақты газ баллоны жанып, нәтижесінде өрт қойманың жанында орналасқан газбен толтырылған 3 текше метрлік “ЗИЛ” маркалы газ құю машинасына өтті. Сонымен қатар, қоймада әртүрлі сыйымдылықтағы шамамен 260-300 дана газ баллондары болған. Сондай-ақ, қойманың жанында газбен толтырылған 4 текше метрлік жерасты қоймасы орналасқан. Өрттің 30 метр қашықтықта орналасқан тұрғын үй алабына қарай ойысу қаупі туындады. Оқиға орнына жеткен өрт сөндірушілер жедел әрекет жасап, газ құятын автомобильді, газы бар жерасты қоймасын, сондай-ақ қоймадағы қалған баллондарды жарылудан сақтап қалды.
Өрт бір сағаттан соң толық сөндірілген.
Өрт салдарынан газ құю станциясының 2 қызметкері тұрлі дәрежеде күйік шалып, жедел медициналық жәрдем қызметкерлеріне тапсырылды.
