Қазіргі қоғамдағы ең өзекті мәселелердің бірі – есірткіге тәуелділіктің көбеюі. Бұл тек жеке адамның емес, тұтас қоғамның қауіпсіздігіне, денсаулығына және болашағына тікелей әсер ететін күрделі мәселе. Әсіресе жастар арасында синтетикалық есірткілердің таралуы алаңдатарлық жағдайға айналып отыр.
Мамандардың айтуынша, есірткіге тәуелділік көбіне қызығушылықтан, құрбы-құрдастың ықпалынан немесе психологиялық қиындықтардан басталады. Алайда оның соңы адамның денсаулығына орны толмас зиян келтіріп, отбасылық қарым-қатынастың бұзылуына, қылмыстың көбеюіне және өмірдің күйреуіне әкелуі мүмкін.
Қазіргі таңда есірткі саудагерлері заңсыз заттарды әлеуметтік желілер мен түрлі интернет-платформалар арқылы жасырын тарату тәсілдерін жиі қолданады. Бұл жағдай құқық қорғау органдарының жұмысын күрделендіріп қана қоймай, жастардың қауіпсіздігіне де үлкен қауіп төндіреді. Сондықтан әр азамат күмәнді ұсыныстардан сақ болып, заңсыз әрекеттер туралы тиісті органдарға хабарлауы маңызды.
Есірткінің адам ағзасына тигізетін зияны өте ауыр. Ол жүйке жүйесін зақымдап, есте сақтау қабілетін әлсіретеді, жүрек пен тыныс алу мүшелерінің қызметін бұзады. Сонымен қатар тәуелді адам өз өмірін ғана емес, айналасындағы жақындарының да өмірін қиындыққа душар етеді.
Бұл мәселемен күрес тек құқық қорғау органдарының міндеті емес. Отбасы, мектеп, жоғары оқу орындары және жалпы қоғам жастарға дұрыс тәрбие беріп, салауатты өмір салтын насихаттауы қажет. Спортпен айналысу, өнерге қызығу, кітап оқу және қоғамдық жұмыстарға белсенді қатысу жастарды зиянды әдеттерден алшақ ұстайтын маңызды факторлар.
Есірткіге қарсы күрестің ең тиімді жолы – оның алдын алу. Жастарға есірткінің зияны туралы ашық әрі нақты ақпарат беру, олардың өмірлік мақсаттарын айқындауға көмектесу және қолайлы әлеуметтік орта қалыптастыру – қоғам алдындағы маңызды міндет.
Бүгінгі жас – ертеңгі елдің тірегі. Сондықтан әрбір жас өз денсаулығына жауапкершілікпен қарап, есірткіден саналы түрде бас тартуы тиіс. Денсаулық – ең қымбат байлық, ал жарқын болашақтың кепілі – салауатты өмір салты.
Тоғжан ЖОЛДЫҒАЛИ