Алматы облысында 1 наурызда сейсмикалық жаттығулар өтеді. Облыстық төтенше жағдайлар департаментінің хабарлауынша, сейсмикалық жаттығу басталар алдында облыс аумағында сирена ойналып, жаттығу басталатыны туралы тұрғындарға хабарланады. Департамент осыған байланысты тұрғындарды сиреналар қосылған кезде дүрбелеңге түспей, жаттығуға белсенді қатысуды сұрайды.
Жаттығу ережесі бойынша, тұрғындар сирена ойнаған кезде қажетті киім, тамақ, құжаттарын жинап, эвакуацияға дайын болуы керек. Эвакуация кезінде азаматтар ғимараттардан сыртқа шығып, қауіпсіз орындарда – электр желілері мен бағандары, ағаштардан және ғимараттардан қашық жерлерде жиналуы қажет.
Департамент кәсіпорындар мен түрлі ұйымдар басшыларын өндірісті қауіпсіз түрде тоқтатып, жұмысшыларды қауіпсіз жерге шығаруды, апатты құтқару қызметін, азаматтық қорғау құрылымдары мен техникаларын дайындыққа келтіруді сұрайды.
