№376 сайлау учаскесінде «Әжелер ансамблінің» мүшелері қазақтың ұлттық киімдерін киіп, Құрылтай депутаттарын сайлауға қатысты. Аға буын өкілдерінің ел өміріндегі маңызды қоғамдық үдеріске белсенді араласуы сайлау күнінің мазмұнын ұлттық құндылықтармен, салт-дәстүрмен және ұрпақ сабақтастығымен айшықтай түсті.
Ұлттық нақыштағы әсем киіммен сайлау учаскесіне келген әжелер қауымы өздерінің азаматтық ұстанымын білдіріп қана қоймай, қазақ халқының ғасырлар бойы қалыптасқан мәдени мұрасын дәріптеді. Қамзол, орамал, зерлі әшекейлер мен ұлттық сәндік элементтер олардың елдік болмысқа, ұлттық дәстүрге деген құрметін айқын көрсетті.
«Әжелер ансамблінің» мүшесі Галина Егебаева Николойқызы өз сөзінде ел өміріндегі маңызды мәселелерге әр азаматтың белсенді араласуы қажет екенін атап өтті.
«Бүгін біз ұлттық киімімізді киіп, Құрылтай депутаттарын сайлауға келдік. Бұл – біз үшін жай ғана дауыс беру емес, ел болашағына деген азаматтық жауапкершілігімізді білдіретін маңызды сәт. Құрылтайдың жұмысы халықтың мүддесін жеткізуде маңызды рөл атқарады деп ойлаймын. Сондықтан әр азамат өз таңдауына жауапкершілікпен қарап, ел болашағына бейжай қарамауы керек. Біз аға буын ретінде кейінгі ұрпаққа әрдайым үлгі көрсетуге тырысамыз. Ұлттық дәстүрімізді дәріптеп, сонымен қатар қоғамдық өмірге белсенді араласу – біздің басты ұстанымымыз», – деді Галина Егебаева Николойқызы.
Оның айтуынша, ұлттық құндылық пен азаматтық белсенділік бір-бірінен ажырағысыз ұғым. Себебі елдің болашағына алаңдау, қоғам өміріне араласу және өз таңдауын жасау – Отанға деген жауапкершіліктің көрінісі.
Аға буынның сайлау учаскесіне ұлттық киіммен келуі де осы ойдың мазмұнын аша түсті. Қамзол мен орамал, ұлттық нақыштағы әшекейлер арқылы әжелер өздерінің салт-дәстүрге деген құрметін көрсетіп, жастарға тағылымды үлгі көрсетті.
Құрылтай депутаттарын сайлау – елдің қоғамдық дамуына қатысты маңызды таңдаулардың бірі. Бұл үдеріске әр буынның қатысуы қоғамдағы ортақ жауапкершіліктің бар екенін аңғартады. Әсіресе аға буынның азаматтық белсенділігі кейінгі ұрпаққа «ел тағдырына бейжай қарамау», «өз таңдауыңа жауап беру» және «қоғамдық іске атсалысу» секілді құндылықтарды дәріптейді.
«Әжелер ансамблі» мүшелерінің белсенділігі ұлттық дәстүрдің уақыт өткен сайын жаңаша сипат алып, қоғамдық өмірмен үндесе алатынын көрсетті. Ұлттық мәдениет – өткеннің ғана мұрасы емес, бүгінгі қоғамның рухани тірегі. Ал оны дәріптеу мен келер ұрпаққа жеткізу – баршамызға ортақ міндет.
№376 сайлау учаскесіндегі бұл көрініс сайлау күнінің өзіндік мазмұнын арттырып, азаматтық таңдау мен ұлттық рухтың бір арнада тоғысқанын көрсетті. Әжелердің елдік мәселеге белсенді қатысуы – жасқа қарамай әр азаматтың қоғам өмірінде өз орны мен жауапкершілігі бар екенін айқындаған тағылымды мысал болды.
