Өңірлік коммуникациялар қызметінің алаңында елімізде және жергілікті деңгейде волонтерлікті дамыту және қолдау шаралары туралы айтылды. ҚР Мәдениет және ақпарат министрлігінің қолдауымен «Birgemiz: áreket ýaqyty» волонтерлік саласындағы іс-шаралар кешенін ұйымдастыру» шеңберінде республика бойынша волонтерлікті мемлекеттік қолдау стандартын біржолғы енгізу мақсатында 17 облыс пен республикалық маңызы бар 3 қалада іс-шаралар мен кездесулер кешенін өткізу басталған. Бастаманы сапалы іске асыру үшін ҚР Мәдениет және ақпарат министрлігінің, үкіметтік емес ұйымдардың және волонтерлікті дамыту саласындағы қызметті жүзеге асыратын халықаралық ұйымдар өкілдерінің қатысуы көзделген.
Елімізде, халықаралық аренада да волонтерлік салаға деген қызығушылықтың артуына байланысты аталмыс іс-шара қолға алынған. Брифинг спикері Ұлттық волонтерлік желі атқарушы директоры Татьяна Миронюк іс-шара барысында талқыланатын тақырыптарды тілге тиек етті. Ол өз сөзінде:
– Волонтерлікті дамытуға ықпал ететін табысты тәжірибелер мен жобаларды анықтау, аймақтардағы волонтерлік саладағы бар проблемалар мен қажеттіліктерді талдау, ҮЕҰ, волонтерлер топтары мен жергілікті атқарушы органдар арасындағы ынтымақтастықтың ықтимал жолдарын талқылау, 2024-2027 жылдарға арналған волонтерлікті дамытудың Жол картасына ақпарат жинау арқылы волонтерлік іс-шараның маңызы артпақ, – деп атап өтті. Келесі болып сөз алған Алматы облысының Азаматтық альянсы президенті Балжан Досалы облыс өңіріміздегі жастар жайлы жалпы ақпарат таратып, волонтерлік бағыттағы шараларға тоқталды. Бүгінгі таңда облыс аумағында 14 жастан 29 жасқа дейінгі жастар саны – 280 017 адамды құрайды. Жастармен жұмыс жүргізу үшін «Ұйымдастырушылық бөлімі», «Жастар бастамаларын дамыту және NEET тобымен жұмыс бөлімі», «Аймақтар бөлімі» және «Ақпараттық сүйемелдеу және әлеуметтік желілермен жұмыс істеу бөлімі» қызмет атқарады. Балжан Досалы өз сөзінде:
– Өңірімізде волонтерлік бағытта 195-тен аса шара өткізіліп, оған 3110-ға жуық жас қатысты. Бүгінгі таңда облыс аумағында 3598 волонтер тіркеліп, 36 волонтерлік ұйым қызмет атқарады, – деп айтып өтіп, «BizBirgemiz» республикалық фронт-офис бағыты бойынша атқарылған жұмыстарға тоқталды. 2021-2023 жылдарға арналған волонтерлікті дамыту жөніндегі республикалық жол картасына сәйкес «Білім», «Сабақтастық», «Таза әлем», «Салауат», «Қамқор», «Асыл Мұра», «Үміт», «Аяла» бағыттары бойынша жүйелі жұмыстар атқарылуда. Сондай-ақ, «Адалдық», «JaryqTeam», дебат және «Жайдарман», «Speaking Club» және жас әншілерге арналған «АниБарс» пен «Shanyraq» клубтары жастардың бос уақытын тиімді пайдалану үшін қызмет көрсетуде.
Құралбек СӘБИТОВ
