Бүгін таңертең Қонаев қаласының әкімі Нұрлан Құматаев жұмыс күнін жергілікті автопаркты аралаудан бастады. Ол жүргізушілердің медициналық бақылаудан өткені жайлы журналды және автобустардың техникалық жағдайын тексерді. Қала әкімінің айтуынша, ең алдымен, жолаушылардың қауіпсіздігіне жіті назар аудару қажет. Ол үшін жүргізушілердің денсаулығы жарамды болып, қоғамдық көлік талапқа 100% сәйкес келуі керек.
«Біз автопаркке бөлінетін субсидия көлемін арттырып жатырмыз. Сондықтан қызмет көрсету сапасы да жақсаруы керек. Бірақ, қазіргі жағдай өте жақсы деңгейде емес. Халықпен кездесулерде “Арна” шағын ауданы мен саяжай алқаптарының тұрғындары автобустың кешігіп жүретініне үнемі налиды. Жұмысты жандандырып, жұртшылыққа дұрыс қызмет көрсету қажет», – деді Нұрлан Құматаев автопарк басшысына.
Өз кезегінде компания басшысы әр автобуста диспетчерлердің және автопарк әкімшілігінің байланыс нөмірлері жазылған ақпарат ілініп тұрғанын айтты. Қандай да бір шағым болса, тұрғындар бірден басшылыққа хабарлай алады.
Айта кету керек, бұл компания тек жолаушылар тасымалымен ғана айналысып қоймай, коммуналдық қызмет көрсетеді. Оның ішінде, жеке үйлерден қоқыс шығару да бар.
«Тұрмыстық қатты қалдықтарды шығару таңнан басталуы тиіс. Қоқыс тазалауға шығудың орнына, мен көрсін деп істеп қойғандай, техниканың бәрі тізіліп тұр. Одан да міндеттеріңізді орындағандарыңыз жөн еді», – деді шаһар басшысы.
Жалпы қалада 10 бағытта 23 автобус қызмет көрсетеді. Жол жүру бағасы – 80 теңге, ал оқушылар мен студенттерге – 40 теңге. Көпбалалы аналар мен 78 жастан асқан тұрғындар автобуста тегін қатынайды.
Автопарк жұмысымен танысқан Нұрлан Құматаев желтоқсанда 4 автобус қолданысқа берілетінін атап өтті.
“Қыстыгүні тұрғындар автобуста мұздап қалмауы қажет. Осы мәселені бақылауға алыңыздар”, – деді әкім.
