Отбасы – адамға жылулық пен қолдау сыйлайтын ең маңызды орта. Алайда отбасындағы зорлық-зомбылық адамның денсаулығына, психологиялық жағдайына және өміріне ауыр зиян келтіруі мүмкін. Сондықтан тұрмыстық зорлық-зомбылықтың алдын алу – қоғам алдындағы маңызды міндеттердің бірі.
Зорлық-зомбылық тек физикалық күш қолданумен шектелмейді. Қорқыту, қорлау, жүйелі түрде кемсіту, бостандығын шектеу және қаржылық бақылау да адамның құқықтары мен қадір-қасиетіне нұқсан келтіруі мүмкін.
Әрбір адам қауіпсіз өмір сүруге және құрметке лайық. Отбасындағы мәселелерді күшпен емес, өзара түсіністікпен, сабырлы әңгімемен және қажет болған жағдайда мамандардың көмегімен шешу керек.
Егер адам тұрмыстық зорлық-зомбылыққа тап болса немесе оның куәсі болса, бұл жағдайды елемей қалмауы қажет. Қауіп төнген кезде 102 немесе 112 нөміріне хабарласуға болады. Сондай-ақ дағдарыс орталықтары мен әлеуметтік қызметтерден көмек сұрауға болады.
Тұрмыстық зорлық-зомбылықтың алдын алуда құқықтық сауаттылық, отбасылық тәрбие және қоғамның қолдауы ерекше рөл атқарады. Әрбір азамат зорлық-зомбылыққа төзбеушілік мәдениетін қалыптастыруға үлес қосуы тиіс.
Отбасындағы тыныштық қорқынышқа емес, сыйластыққа негізделуі керек. Зорлық-зомбылыққа жол жоқ!
Тоғжан ЖОЛДЫҒАЛИ