Қонаев қаласы мен оған қарасты елдімекендерде бұралқы иттерді аулау жұмысы кестеге сәйкес жүргізіліп жатыр. Қонаев қалалық әкімдігі баспасөз қызметінің хабарлауынша, жыл басынан бері қалада 154 бұралқы ит ауланған.
Қаңғыған иттер мен мысықтарды аулауға гельмен қапталған арнайы ілмектер қолданылады. Жануарлар иесі жанында болмаған жағдайда ғана ауланады. Сол мезетте арнайы акт жасалады, кейіннен изоляторларға қамалады. Ол жерде жануарлар клиникалық тексерістен өтеді. Уақытша ұстауға арналған орындар жануарларға ыңғайлы етіп жасалған. Оларға уақытылы тамақ беріледі.
Адамдарға шабуыл жасаған немесе ауру жануарларға 3 күн бойы дәрі-дәрмек беріледі. Қалған иттер мен мысықтарға чип орнатылып, стерилденеді, кастрациядан өтеді. Бұл шаралардан кейін жануарлар иесі табылғанға дейін 14 күн изоляторларда болады, иесі табылмаса, ауланған жеріне қайтадан жіберіледі.
